Nongstoiñ: Ka MLA jong ka Boko, Kamrup Assam ka Nandita Das mynta ka sngi kala wan ban jurip hi da lade ia ka jinglong jingman hapoh ka thaiñ Langpih kata hadien ba kala don ka jingiakajia tang ka daw ba ka ki pulit Assam ki la shah khang lad noh ha ki pulit ka Meghalaya halor ka jingthmu wan buh ktem ha ka shnong Umwali.
Ia katei ka MLA la wan ban synran lang ruh da ki pulit Assam bad katei ka MLA kala leit ban jngoh ruh ia kawei jaka ha jan ka wah Umlon jong ka shnong Umwali ia kaba ka Assam ka la thmu ban tei bad pynieng ia ka ktem pulit.
Katei ka MLA kala leit ruh ban iakynduh kyrpang ia ki paidbah kiba na Assam kiba shong ba sah hapoh ka shnong Lawbah bad wanphai pat sha Ïew Langpih.
Haba iakren bad ki nongthoh khubor jong ka West Khasi Hills, ka Nandita Das ka la iathuh ba ka jingwan jong ka sha Langpih ka long ban wan peit bad jngoh ia ka jinglong jingman ha katei ka thaiñ namar kumba kala paw ha kine ki taiew bala dep kala don ka kynrum kynram kaba la wanrah ruh iaka jingbym shong suk shong shngaiñ jong ki paidbah.
Ha kaba iadei bad ka jingshah khang lad ki pulit Assam ban buh ia ka ktem ka jong ki ha Umwali katei ka MLA kala ong ba kiba bun ki shnong ha ka thaiñ Langpih kidei kiba dang hap hapoh u pud u sam jong ka Jylla Assam bad kala pynskhem ruh da kaba kdew sorbe jong ka Map ka Ri India.
Shuh shuh katei ka MLA kala ong ruh ba na ka liang jong ka sorkar Assam kan hap ban thaw bad pynieng beit ia ka ktem pulit ha Umwali bad kiwei kiwei kim donhok ban tuklar namar ka dei ka jaka jong ka Assam bad ia katei ka ktem la mang pisa ruh lyngba ka sorkar Assam.
Ha kajuh kapor katei ka MLA kala pynpaw ruh ba kam kwah ba kin mih kino kino ki jingiasngewpher jaitbynriew kumta kala kyntu ruh ia ki Myntri Rangbah jong ki ar tylli ki Jylla ba kidei ban iakren na ka bynta ban ia pynbeit noh ia ki jingiakajia pud khang ba ki paidbah ka Assam kin ioh ia ki jaka jong la jong bad kumjuh ki paidbah ka Meghalaya ruh kin ioh ia ki jaka jong la jong.
Ka Sorkar Meghalaya ka dei ban kylli iaka Sorkar pdeng balei ba khlem pyntreikam iaka kyndon jongka Instrument of Accession kaba la ia mynjur baki shnong khasi baroh kiba ju hap hapoh ki hima khasi ki lah ban wan iasnoh lang biang bad kita ki hima. Ban jin dala burom ia kane ka jingiateh kular kan nym jin dala mih ka kynrum kynram khappud katne katne.