“Kam ka ARPA ba ka lah ban wanrah dorbar kyrpang”

Shillong, 15 Jymmang:
U bah Metbah Lyng doh u nongialam ba thym mai ka ARPA haba kren ai khublei ia u CEM ba thymmai ka KHADC ha poh ing dorbar u la ong ba ka jinglah ban pynlong ia ka dorbar kyrpang ban jied CEM thymmai ka dei lyngba ka jingtrei shitom ka ARPA kaba la leit ban tynruh na ka por sha ka por sha u Lat ka jylla, naba kam kwah ban wan ka synshar Administrator ha KHADC bad u la ong ruh ba ka jingweng noh jong u ia ka kyrteng na ka jingiakhun elekshon ka dei namarba um kwah ba kan wan ka synshar Adminstrator ha KHADC.
Ki nongialam ka ARPA kynthup u bah Ardent M Basaiawmoit ki la ong ba ka sorkar ka kwah eh ban pynjari da ka synshar Administrator ha KHADC hynrei u Lat u la kyntait ia katei ka jingtyrwa ba ki phah, bad ki la ong ba ki la sngewthuh lypa ba la wan ka synshar Administrator ka sorkar ka lah ban pynurlong ia ki jingangnud jong ka kiba ka la thmu ban pyntreikam la kham mynshuwa, kaba katkum ka jingiakren jong ki la sngewthuh ba kawei na kita ka dei ka tih Uranium.
Hynrei haba shim ia ka bynta ban kren kum u nongialam ba thymmai ka KHADC u bah PN Syiem u la kyntait ba ka dei tang ka bor jong ka ARPA ba la lah ban pynlong ia ka dorbar kyrpang ka KHADC, hynrei baroh ka dei ka jingiatreilang jong ka PDF, ka ARPA bad ka sorkar jylla kumjuh ba la lah ban pynlong dorbar jied CEM.