Kam ju don ka por, ba ngin khang internet, haba ngi don ha ka bor, ong U Mukul

Shillong:U Dr Mukul Sangma, u ba dei u nongialam jong ka Meghalaya Trinamool Congress, mynhynnin ka sngi u la ia kren bad ki nongtrei jong ka Mahila Trinamool Congress, ha kaba la pynlong da ki nongtrei mahila jong ka 17-north Shillong Block ha Aurobindo Ashram, Bivar road Shillong.
Ha ka jingia lang ba i phuh i phieng bha, ha kaba ki longkmie, nongtrei bad nongkyrshan jong ka Meghalaya Trinamool Congress, ki ia don lang.

Haba ai jing kren ha kane ka sngi, kum shibynta ban pyn jan ia ki nong ialam bad u paidbah, u Dr Sangma u la kren, da ka ba ong ba kum ka jylla ka ba bud ia ka riti dustur ban ai jait sha ki kynthei, kaba burom ia ki long kmie, ka parti Meghalaya TMC, ka shah shkor bha ia ki long kmie, khamtam lei ha ba iadei bad ka jingeh kaba ki ia kynduh. Ki long kmie ha kane ka sngi ki la buh ruh ka jing kylli ia u Dr Mukul Sangma ha kiba bun ki mat kiba ktah ia ka imlang sahlang bad ia u paidbah.

Haba jubab ia ka jing kylli ba iadei bad ka jingjia ha Mukroh, u Sangma u la jubab ba ka jing pyniap dusmon la dei ban kiar, namar ka jing jia hi kam dei halor ka jing ia kulmar jong ki kynhun jaitbynriew, hynrei ki dei ki jingleh jong ki bor sorkar. Ka la dei ban don ka jing thew ba biang na baroh ar tylli ki sorkar, hynrei kum kine ruh la ioh i ba kim don, ka jing ia kren bad ki ar tylli ki sorkar jylla ruh ka jah.

Haba iadei bad ka jing kylli ba khang ia ka internet da ka sorkar jylla, u la jubab ba ka dei ka jing duna buit jong ka sorkar bad ula ong “Ha ka por ba ngi don ha ka bor, ym don kawei ruh ka por ba ngin khang ia ki internet, halor ka nongrim ban wan rah ia ka shong suk shong shngain bad ban the lakam ia ki jing pynkheiñ aiñ”.
U nongialam jong ka liang pyrshah, u la ong ba ka sorkar hi ka la pheil ha kiba bun ki liang la ka dei ha ka pule puthi ne ha kiwei kiwei pat ki bynta, namar ki don ka jing mang pisa tang na bynta ka tulop jong ki nongtrei, ym ban iarap ban pynkiew ia ka pule puthi. U la pynkynmaw ruh ba ha ka por jong u kum u nongialam jong ka jylla, u la thmu ban buh ki kolej sorkar ha baroh ki distrik jong ka jylla Meghalaya na ki artylli ki kolej sorkar ba don ha ka jylla. “Ngi la buh ruh iaka science and commerce kolej ha Mawphlang, katba ha ki bynta jong ka Garo hill ngi la buh ia ki kolej pule enginiar bad architecture kolej”.

U Dr Mukul Sangma, u la jubab ruh ia ka jing kylli haba iadei bad ka jing khap ngiah ki surok ha kaba ka bam por da ki kynta ban leit ban wan bad u ne u nongialam u la ong ba ha ka por ba u dei u nongialam jong ka jylla,u la pynmih ia ka jingshna ia ka four lane,ia ka surok Jorabad sha Shillong, ka ban iarap ban pynduna ia ka jing sahkut kali ha ka leit ka wan; katba ka sorkar ba mynta ka la pynsepei ia ka por san snem ban thaw ia ki surok ki ba lah ban ai jing myntoi ia ki paidbah, kum ka western bypass.U la pynkynmaw ruh ba ha u snem 2012,u la ai sha ki paidbah jong ka jylla ia ki bos saw, ki ban iarap ia ki paidbah jong ka jylla ha ki bynta jong ka sor bad khap sor ruh kumjuh.

Ha kane ka sngi la ioh ruh ia ka jingrwai ba sngewtynnad na u kaitor bah Banker kharkongor. Kiwei ki nongialam kiba ia don lang ki kynthup ia ka kyrtong ka parti na 17-north Shillong Constituency,kong Elgiva Gweneth Rynjah, bah James Lyngdoh Secretary ka TMC meghalaya,kong Kathleen Marbañiang Vice- president jong ka Meghalaya Mahila Trinamool Congress, nalor kiwei pat ki nongialam bad ki nong kyrshan kiba ia donlang ha katei ka sngi.