Shillong:U Chairman-cum-Managing Director ka Meghalaya Energy Corporation Limited (MeECL) u Sanjay Goyal, u la ong ba kam don ka jingpynsah pisa ban siew sha ki kompeni ba thied bording ka MeECL, lait noh tang ha ka NTPC ba ka don ka kam mukotduma bad kane ka dang iaid ha ka jingiapynbeit.
Haba kren sha ki lad pathai khubor mynta ka sngi, u Sanjay u la ong ba ka MeECL ka siew thikna ia ka bai thied ding na ki kompeni ka sorkar pdeng bad u la ong ba yn pyrshang ban ym pynsah ia ka bai thied bording bad shisien ba siew ia ka bai ding ha ka por kaba biang, ka MeECL ka kiew ha ka jingioh kyrdan ha ka jingleh bha. “Ki jingsiew kim don sha ki kompeni ba thied ia ka bording lait noh ha ka NTPC ba don ki jyrwit jyrwat, ka kam mukotduma”, la ong u Sanjay.
U la ong ba mynshem snem ka kyrdan ka MeECL ha ka bording ka poi shaduh D kaba dei ka kyrdan ba ha trai duh.
Ha kajuh ka por, u la ong ba ha ka por tlang, ka MeECL ka iakynduh mawsiang bha, namar ba kyrduh bording na ka jingtlot pynmih ding ki projek ha ka jylla na ka jingduna um bad namar kane, la hap ban thied nabar ne ban shu siew kylliang ha ka por lyiur.
Shuh shuh u Sanjay u la ong ba ka MeECL ka dang thaw lad ban pynmih bording na u dewiong ruh ha ka jylla.
Phi don ban ong eiei?