![](https://www.urupang.com/wp-content/uploads/2023/06/image-97.png)
Shillong:Ka myntri ka tnad ka koit ka khiah ka jylla ka kong Ampareen Lyngdoh, mynhynnin ka sngi ka la ong ba kam don kano kano ka jingpynslem ia ka jingpyntreikam ia ka Shillong Medical College.
“Kam dei, ha ka jiingshisha, ka jing pynslem ban pyniaid ia ka Shillong Medical College. Ia mynta ngi la pyn khreh ban leit rah sha ka jingialang ka kyn hun myntri, ban wad kiei ki lynti kiba biang tam ban pyntreikam ia kane ka College, kaba dang sah teng haduh mynta”, la ong ka kong Ampareen.
Ka la ong ba ka sorkar ka dang pynkhreh ia ka mat ban leit rah sha ka kynhun myntri kumno ban pyniaid ia kaneka college, kaba lah ban long da ka Public Private Partnership (PPP) mode ne ban iatreilang bad ki hospital sorkar kum ka Civil Hospital kum ka Medical College ne ban iatreilang bad ki skulbah kiba la treikam pura.
“La don katto katne tylli ki jingai jingmut, ki don ar tylli ki jingai jingmut, kawei ka dei ban pyntreikam pura da ka Public Private Partnership (PPP) bad kawei pat, la ka long ne em ban pyniasyrdoh bad ki jaka sumar kiba la don lypa kum ka Civil Hospital, Ganesh Das Hospital ne Reich Chest Hospital ban pynlong kum ki Medical College bad kawei pat ban iatreilang bad ki skulbah kiba don ha ka jylla kum ha Ri-Bhoi”, la ong ka myntri ka tnad ka koit ka khiah.
Katba ia ka Medical College ha Tura kala iaid bha ki kam bad kan leit jngoh ban pynsted ia katei ka college. Ka sorkar ka la trei tyngeh ban pynthikna ba kane ka college kan treikam noh kloi kloi bad ka kyrmen ba ka Meghalaya kan jam shakhmat wat ia ka jylla Assam.
“Ka Meghalaya kan iabeh bad ka jylla Assam ha kane ka bynta. Peit ha ka jylla Assam, nga la ioh ban iathir bad u myntri rangbah ka Assam dang shen, ha kaba nga la iakren bad u, kiei ki rukom treikam ka sorkar Assam halor ki Medical College. La iathuh ba ka Assam ka la pyntreikam ha baroh ki District Hospital bad kila pynlong kum ki Medical College da kaba pynbiang ia ki jingdonkam katkum ki Medical College. Lada ka Assam ka lah, balei ka Meghalaya kam lah, ka Meghalaya kan iabeh bad ka Assam halor kane”, la ong ka Kong Ampareen.
Phi don ban ong eiei?