“Kam don ka jingai jingmut ne batai na ka liang jongnga” ong U MR; halor ka jingkhynra ia ka iing U Bernard

Shillong:U Myntri rangbah ka jylla, u Conrad K Sangma u la ong ba ka jingkhynra jong ki pulit ia ka farm house jong u vice president ka state BJP, u Bernard N Marak, ka dei beit hadien ba ki pulit, ki la don ki sakhi sabut kiba biang bad kam shem la don kano kano ka jingbthah lane ka jingpynthut na ka liang jong u.

Haba ia kren bad ki lad pathai khubor na ka liang u Myntri rangbah ka jylla u la ong “Ka jingkhynra jong ki pulit ia ka farmhouse jong u vice president ka BJP, ka dei kat kum ki kyndon, kat kum ki sabut sakhi ba biang bad kat kum ka ain bad ki pulit ki la bud ia kane kat kum ka ain, kam shem ladon kano kano ka jingai jingmut lane ka jingbatai na ka liang jong nga halor kane ka bynta”.

“Ia nga, na ka liang ki pulit ki la shu pyntip ba kan don kum kane ka jingkhynra, ha kaba nga la ong ia ki pulit ka long ba kaei kaba kin leh ka dei ban long kat kum ka ain bad kat kum ka jingdon ki sabut sakhi kiba biang”u la bynrap.
U Sangma u la ong “Ka long biej ia u briew ban kynnoh ia kine, namar haba don kano kano ka jing bym shong shngain ha ka jylla, wat la u dei uei uei ruh ka ain kan leh ia kaba donkam bad kaei ka ba kin leh kan long hapoh ka ain”.

Ha ba kylli u la ong “Kam dei kaba nga kwah ban jubab, hynrei halor ka ne ka jingkhynra jong ki pulit, u briew u la shu kwah ban pynphai sha ka phang kam sainpyrthei ia ki kam beain, bad kane kan ym don jingiadei eiei bad ka election”.

“Ia kane ka jingkhynra la leh, halor ka jingujor ki nongshong shnong na kane ka thain bad kumjuh na ka jingujor na ka briew ka ba la shah leh ki kam bym man ha kane ka jaka, bad ki pulit ki la pynbiang ia ki sabut sakhi, shwa ba kin khynra ia kane ka jaka bad ngam don por ban pynthut lane ban batai ia kane”u la bynrap.

Haba kylli halor ka jingshah kem u Bernard N Marak na Uttar Pradesh u Myntri rangbah u la ong “Nga dang shu ioh ia ka jingtip ba ki pulit ki la ioh ban kem ia u bad kin dang wan rah ia sha ka jylla” .
Ha ba kylli u la ong “Lada ngi peit ia ki sabut sakhi, bad ia ka jingkynthoh jong u, ka paw shai ba ka don kano kano ka kam ka bym dei kaba ki pyniaid ha kane ka jaka, ngam kwah ban kren eiei ha kaba ka jingtohkit ka dang iaid bad don jingiadei eiei bad ka kam sainpyrthei lane ym namar ka jingiakhun election, hynrei la pyniaid ia ka jingkhynra ia kane ka jaka halor ka jingdon ki sabut sakhi ki ba biang”.