“Kam don jingmut ban don 108 bym biang ki tiar”

Shillong: Haba ia shim bynta ban ia tai ha ing dorbar halor ka mang tyngka, u MLA ka Congress na Mawsynram konstitwensi u bah Himalaya Shangpliang, u la kdew ia kiba bun ki jingdonkam kiba ka sorkar ka dei ban leh na ka bynta ban pynbit pynbiang ia ki lad jingsumar bad ki jingdonkam ha ka tnad ka koit ka khiah.
U bah Himalaya Shangpliang, u la ong ba kumba ka long mynta ki nongtrei jong ka tnad 108 ki don hapdeng ka jingiakhih naba ka sorkar kam shym la ai ia ka hok kaba ki dei ban ioh bad haduh mynta ruh u la ong ba ka sorkar kam shym la leh eiei na ka bynta jong ki. U la kdew ruh ia ka jingduna jong ka 108 bad u la ong ba kam myntoi ban don 108 haba ki jingdonkam kiba dei ban don kim don. “Kam myntoi ban don 108 haba ki jingdonkam ba dei ban don kim don, ki 108 kim don satia ia ka Advance Life Support (ALS) hynrei ki don tang ka Basic Life Support (BLS), kan don jingmut aiu ban don 108” u la ong.
Shuh shuh u la kdew ha kiwei pat ki bynta da kaba kdew ia ka Pynursla CHC bad u la ong ba hangtei ym don doktor bniat bad u la ong ba ka Pynursla CHC ka don ia ka jaka puid hynrei katei ka jaka puid ka dei kaba khlem treikam eiei. U la pynkynmaw ba ha u snem ba la dep ma u ryngkat bad u myntri ka koit ka khiah ki la leit ban jurip ia ka PHC ha Lawbah hynrei haduh mynta ka sorkar kam pat pyni dak eiei.