Kam don jingbakla ban sdang ia ka prokram, da ka jingduwai, ong u MR

Shillong:U Myntri Rangbah ka Jylla u Conrad K Sangma u la ong ba kam don kano kano ka jingbakla ban sdang ia kano kano ka prokram da ka jingduwai, da kaba kdew ruh ba ka dei ka sngi ba kyrpang tam na ka bynta ka Jylla.

Lah ban kdew hangne ba u Myntri ka tnad pule puthi ka Sorkar Jylla u Rakkam A Sangma, u la ong ba ha ka sngi ban plie ia ka Captain William son Sangma State University, yn pynlong shwa da ka jingduwai Kristan. Halor kane la mih ka jingsngewpyrshah da ki kynhun bapher bapher.
Haba kren sha ki ladpathai khubor u Myntri Rangbah u la ong ba kane ka dei ka Program sorkar ka ban khlieh da u Vice Chancellor, kaban bud kat kum ki kyndon ka Sorkar.

“Ngi la khot sngewbha ia baroh ba kin wan ban shimbynta lang ha kane ka program, kynthup ia baroh ki nongialam niam ha ka Jylla” u la ong.
U la bynrap “Kumba ju long ha man ba sdang hi program ngi ju sdang haryngkat ka dwai bad kane kam dei kaba bakla, namar ka dei ka program sorkar kaba baroh hi ki lah ban wan shimbynta bad ngi la khot sngewbha”.

U la ong shuh shuh ba kane ka long ka sienjam kaba donkam tam na ka bynta ki nongshong shnong ka Jylla, ha ryngkat ka mat CUET, ka University ka don bynta ha ki mat kiba kongsan Kum ka jingwad bniah, ka pule puthi bad kiwei kiwei.
“Kumta kane ka dei ka sienjam kaba donkam bad kaban sah kynmaw ia baroh kumta ngin pynlong kongsan ia kane” u la bynrap u Myntri Rangbah ka Jylla.