“Kam dei shuh ka iew kyntang, dei ka iew septic tank”

Shillong, 19 Risaw:
Ka Iewduh ka dei ka iew kaba la sop tang da ki jaboh naduh kjat haduh khlieh bad ia kane la pynpaw da u EM ba peit ia ka iew ka District Council u bah Hadrian Lyngdoh haba jubab ia ka jingkren jong ki MDC kiba la kren ia ka mat ba la wanrah da u bah Pyniaid Sing Syiem mynta ka sngi ha Ing Dorbar ka KHADC.
U EM ka Iew u bah Hadrian u la ong “Ngi la sakhi ia ka jingjaboh ka Iewduh, nga la leit jngoh ryngkat u bah Banteidor Lyngdoh (MDC ka Mawkynrew), ngi lap ba ka jingjaboh kam dei shuh tang ha madan, hynrei haduh tnum ing ruh,katno lei kan long ha ka por slap” ong u ba Hadrian. Shuh shuh u la ong ba dang ha ka 11 tarik mynta u bnai u la leit lang ryngkat u CEM bad kiwei pat ki MDC bad hangtei ruh la lap ba ka Iewduh kam don jingkylla eiei ruh em bad ka jingjaboh ka long kumjuh. “Naduh ka por u Syiem barim,ngi la ai ka hukum ban dei ban pynkhuid ia ka Iew hynrei haduh mynta ruh ym don jingkylla, ka hima Mylliem kam leh eiei , ka dei ka kamram jong ka hima ban pynkhuid haba ka lum khajna nangto” ong biang u bah Hadrian.
U bah Pyniaid Sing Syiem MDC ka Sohryngkham u la wanrah da ka Resolution ha ing dorbar halor ka jingsma iwtung ka Iewduh kaba lah ban ktah ia ka koit ka khiah ki paidbah, u la ong ba ka Iewduh ka dap tang da ki jaboh nadh ki lynti iaid bad ka iew, ka jingdon ki pata kyiad u la ong ba ka ktah ia ki longkpa kiba hap ban tip ia ka bit ka biang ha ing hasem, nangta u la ong ba ka jingsah pathar ki bar jylla ka wanrah ia ki kam jakhlia hapoh katei ka iew. Ula ong ruh ba ka district Council ka dei ban mang tyngka na ka bynta ban pynkhuid ia ka Iewduh.
Katba u bah Adelbert Nongrum pat haba shim bynta ha katei ka mat, u la ong ba mynshuwa ka Iewduh ka dei ka Iew kaba kyntang hynrei mynta ka la kylla kum ka Iew Septic tank, “Kam dei shuh ka Iew kyntang ka la dei ka Iew Septic Tank” u la ong. U la kdew ruh ia ka jinghiar iuhkjat u myntri rangbah ka jylla, u Lat ka jylla bad u CEM ka KHADC ha Iewduh bad u la ong hato kan don ne-em ka jingkylli, “Ngi kwah ban iohi kham khlaiñ ka politik jongno, u Lat ,u myntri rangbah ne u CEM” ong u bah Adelbert. Ka kong Teilinia Thangkhiew haba ia shim bynta lang ka la ong ba na ka por sha ka por la ia krne hapoh iing dorbar shaphang ka Iewduh hynrei kam poi shaei shaei ruh bad ka la pynkynmaw ba ka la wanrah ia ka mat ia tai ba dei ban khang dih sikret hapoh iew hynrei kane ruh kam poi shaei shaei.