Shillong: Myn hynnin ka sngi balang kata ka 2 tarik u Jylliew 2021, u Myntri Rangbah jong ka jylla, u Conrad K Sangma u la leit ban jngoh hi dalade ia ka Tura Civil Hospital bad u la leit ban rung ruh hapoh ka ward ba la buh ia kiba la ioh ia ka jingpang Covid-19.
U Myntri Rangbah u la pynlut por kumba 15 minit haduh 20 minit eiei hapoh katei ka ward bad u la ioh ban iakynduh ruh ia ki nongpang kiba la thiah pang ha katei ka jaka sumar. Na ka liang une u Myntri u la kular ruh ba ka Sorkar kan pynbiang lut ia ki jingdonkam baroh na ka bynta ki jingsumar bad u Conrad u la ai ruh ka jingiaroh ia baroh ki nos bad ki doktor kiba la trei borbah ban iakhun pyrshah ia kane ka khlam ha kane ka por da kaba u la ong ruh ba kam long satia kaba suk ban shu phong sah ia ki PPE baroh 24 kynta.
Shuh shuh une u Myntri u la ong ruh ba khnang ban nym pynkhia than ia ka kam jong ki doktor, ki nos bad ki nongtrei jong ka koit ka khiah kumta u la kyrpad ia ki paidbah ka jylla ba ki dei ban bud thik pa thik ia ki kyndon pyrkhing ba la bthah da ka Sorkar namar ka dang lah kaba phikir dalade ialade bad ban lait ruh na kaba pynsaphriang ia kane ka jingpang.
Phi don ban ong eiei?