Shillong 10 Tarik Lber : u Myntri ka Hima Khyrim , u bah B Sohtun , u la iathuh ba ka Hima shen kan sa ai jingmut ia ka Khasi Hill Autonomous District Council (KHADC) ban wanrah da ka jingpynkylla (Amendment) ia ka ka Khasi Hill Autonomous District ( Nomination Succession and Election of Syiem, Deputy Syiem, Lyngskhor , Bakhraw , Sordar shnat Raid , Longsan Mansan , Shnat Raid , Rangbah shnong,or sordar shnong and Administration of Khyrim Syiemship ) Act 2024 , hadien ba mih ka jingpyrshah na ki khun ki hajar ka 12 Raid na ka thain RiBhoi.
Lah ban kdew hangne ba Ki Dorbar ki Syiem Lyngdoh Basan ka 12 Raid Saw Ksing Saw Lama Sarikrai , kaba hap hapoh ka Hima Khyrim, Ri Bhoi District, ha ka 17 Tarik Rymphang 2025 , ki la wan ban pynpaw ia ka jingpyrshah halor ki lai tylli ki kyndon ka Khyrim Act ka ba dang shu ioh jingmynjur na u Lat ka Jylla dang shen.
Haba kren bad u Myntri ka Hima Khyrim u bah B Sohtun u la ong ba hadien ba ka Hima ka la ioh ia ka jingmynjur na u Lat ka Jylla ia ka Khyrim Act, ka Hima hi ka la sngewkmen hynrei ki don pat ki Raid na Ribhoi ki sngewpher khamtam ha ka jingmih ka kyntien shnat Raid , kaba ki la kynnoh ba long kumba ki la shah knieh ka jingithuh ia ki .
“Ha ka Khyrim Act ia ki 12 Raid ha ki them Ri Bhoi la ithuh Kum ki Raid, kaba sdang naduh ka Raid Iapngar haduh Sarikrai, kumta ngi la pynbeit ia kane namar ki 12 Raid ki hap hapoh ka Raid Mawshai kaba long Kum ka kmie , bad ym lah ban ai kyrteng kumjuh ia baroh na ka juh ka longing kumta ngi la rai ban ai jingithuh noh da ki shnat Raid ” u la ong .
” Halor kane dang shen na ka Liang u Syiem ka Hima Khyrim, u Paiem Balajied Sing Syiem , u Syiem khynnah Habapan Sing Syiem , bad ki Myntri ki la hair sha ka ne ka Raid ban iakynduh ia ki nongshynshar ki Longsan mansan ki Rangbah shnong Jong ka Raid Iapngar ban pynsngewthuh halor kane ka aiñ Jong ka Hima Khyrim” u la bynrap .
U Myntri u la iathuh ba Kane ka aiñ kam dei kaba knieh noh ia ki bor Jong ki Longsan mansan ha ka Hima hynrei la shu pynpher ia ka kyrteng , namar ha ka Raid Mawshai don haduh 12 Raid ki hap hapoh ka ne ka Raid.Ha kane ka jingiakynduh ngi la pynshai bad ai jingmut ruh ba lada ki wit ia ka jingpyndonkam ia ka kyntien shnat ki lah ban ai da kawei ka kyntien kaba la mynjur lang bad halor kane na ka liang ki riew Rangbah ki la ong ba kin sa shong pyrkhat.
U la iathuh ruh ba ka Khyrim Act, kam dei shuh kaba la sah tang ha ka Hima hynrei la pynbeit da ka Autonomous District Council bad la ioh jingmynjur na u Lat ka Jylla , kumta ban pynkylla ia kane kan long lyngba ka jingwanrah da ka Amendment hapoh ka Ingdorbar lyngba ka jingiasyllok lang bad u khun u hajar ka Hima .
Halor ka jingkynnoh ba don ka jingshah pynduh jingithuh ki ktto katne ngut ki Kur ha kane ka Ain u Myntri u la ong ka dei ka jingshisha ba don na ki kur ki bym shah kynthup Kum ki Longsan mansan ha ka ne ka Aiñ , hynrei halor kane ka Hima kan s alum ka jingialang bad baroh ki Kur na ki 12 Raid na Ribhoi Bhoi , khnang ban ioh ban kynthup lang ia baroh ki Kur kiba khlem shah kynthup hapoh kane ka aiñ .
Haba kylli u la ong ba “Kam da don eh ka jingkyrkieh na ka liang ka Hima hynrei na ka liang ka District Council ka la pynkyrkieh , ban shna noh ia kane ka aiñ namar ba dei tang ka Hima Khyrim ka bym pat don la ki Jong ki aiñ khamtam ba ka dei ka Hima ka ba don ha khmat na baroh , Bad ha ka jingbishar Jong ngi , ngi iohi kumba ka la biang , bad kam dei ka jingleh kyrkieh hynrei ka dei namar ba la i donkam ban don ia ka Aiñ” .
Halor ka jingbyrngem ban ym treh shim bynta ki 12 Raid na Ribhoi ia ka jinglehniam pomblang, u Myntri u la ong ba “ngi la pynbeit ia kane ka jingshah ialam bakla ka Hima hi kan leh kloi kat ba lah namar ngim kwah ban don kano kano ka jingkynad bad ki khun ki hajar khamtam ha ka ba iadei bad ka jingleh niam”.
Phi don ban ong eiei?