Kam dei ka hok nongkynti jong U Conrad, Bah Prestone, ong u nongialam ka HYC

Shillong:Hadien ba la pynmih kyrkieh ka sorkar jylla ia ka jing thmu ban pynkynriah noh ia ki Harijan bad ban ai jaka na ka bynta ki 342 tylli ki iing, ha ka jaka, kaba ha R.P.Chest Hospital kaba ha Mawbah, Upper Mawprem; hynrei kane ka jing leh ka sorkar, ka la pynlong ia ki paitbah bad ki sengbhalang ba kin pyrshah.

Ka seng Hynniewtrep Youth Council ne HYC, ka la ai khublei bad kyrshan ia ka Dorbar Shnong Mawbah, kaba la mih ban pynpaw ka jingpyrshah ia ka jingthmu ai jaka ei ka sorkar ha ka jaka sorkar kaba don ha Upper Mawpem. U president rangbah ka seng HYC u Bah Roberthjune Kharjahrin, ula kyrshan bad halor ka jingthmu ka sorkar ban ai jaka ei ia ki Kharmetor kiba shong thap shong beain ha Them Iew Mawlong.
U Bah Robertjune Kharjahrin, da ka bym sngewtynnad bad khlem lah pdiang satia, ia ka jingleh thurmur jong ka sorkar Meghalaya ban pyrkhat bieij ban pynwad jaka ei ne pynshna iing shna sem ba kyrpang ia ki Harijan.

U Bah Kharjahin, ula ong, ba ki briew ba sah ha Them Iew Mawlong ki don ar kynhun, kawei ka dei ia kiba trei hapoh ka Shillong Municipal Board ne ha ki tnad sorkar bapher bapher bad ki don sa kiba shong behain ne shong iing wai ha kitei ki jaka jong ka Hima Mylliem ne jaka sorkar.

U Bah Robertjune ula ong, ba kam pat ju don kata ka sorkar ban ai khyndew, ai jaka ei ia kiba trei sorkar wat ia kiba lah heh ban pyntei iing paki dulan. Ha kajuh ka por, ula ong balei ka sorkar ka shim kyrpang ia ki kharpoi ei poiwir kiba trei hapoh Municipal Board ban tei iing bad ula ong ruh ba lada ka long ha kane ka dur, ki nongtrei sorkar baroh kin sa dawa bad lada ka sorkar ka lah ban ai jaka ei ka mut ka jing lut kaba khraw da ka pisa ki paitbah. Ula ong shuh, ba ka sorkar ka dei ban ai da ki jaka sah ne Quarter ba kin sah katba dang trei bad ynda ki la kut noh kata ka shong, sa ha ka jing stad jong ka sorkar, ula ong. Shuh shuh, u ong, ba lada ka sorkar, ka ai jaka ei ia ki Harijan, ka dei ban ai shwa ia ki baduk kiba dei trei Ri trai Muluk.

U Kharjahrin, ula kyntu ia ka sorkar ba kam dei ban pyndem tdong ia kitei ki Harijan bad ruh ba ia kane ka mat kaba lah slem ka dei ban pynkut noh bad ba kam dei ban pynktha khlieh, pynjrong kai ia ka kam shisien ba dei ban pynkynriah, pynkynriah beit bad ka seng ka pyrshah jur ia kane ia kane ka jingthmu ka sorkar, namar kane kam dei ka hok nongkynti jong u Conrad ne jong u Prestone, hynrei ka dei ia kaba la thied da ka um syep jong jong ka pisa u paitbah.