Shillong:Ka Voice of People Party (VPP), mynhynnin ka sngi ka la pynlong ia ka jingialang ban pynithuh paidbah ia ki 29 ngut ki kyrtong ki ban ia khun ia ka MDC election na ka bynta ka Jaintia Hill Autonomous District Council (JHADC) ha ka jingialang ba la pynlong ha Iawmusiang Jowai.
Haba kren ha kane ka sngi na ka liang u President ka VPP u bah Ardent Miller Basaiawmoit u la pynshai halor ka rai ban ai ticket ia uwei u MDC u ba dang don ha ka shuki u bah Andrew A Shullai, u ba dei u nongmihkhmat ia ka Jowai North MDC constituency, ka long hadien ba ka party ka la dep ban bishar bha.
“Ha ka por ba ka VPP ka la leit kylleng kylleng ka Ri khasi Jaintia, ym shym la don uwei ruh u nongialam ka VPP u ban ong ba ngin ym sei ia uno uno u kyrtong uba thymmai suda, ha kane ka election ngi khlem pyndonkam ia ka kyntien ‘tang kiba thymmai’ lane ym don uwei ruh u ban ong ba ngin ym ai ticket tdot tang ia kiba la long MDC kam ju don kum kata ka jingong na ka liang ka VPP”.
U la bynrap “Hynrei ngi ong ban sei tang ia ki biang bad kiba dang khuid bad kiba dang thymmai bad ka jingai ticket ia une u MDC u ba dang don ha ka shuki na North Jowai, kam dei ba ngi ai tang ba u dei u MDC, hynrei haba la poi kata ka jingpan ticket, ka la don kata ka jingtohkit ka jingbishar bha”.
U bah Ardent u la ong ruh “Ka nongrim jong ka VPP ka la tynjuh ruh ia une u MDC ba balei u kwah ban ialeh na ka party VPP? Hato ka dei ba ka don ka lyer ka jingjop ne kaei? Kum ki nongialam ka party ngi sngewthuh ba une u MDC u ba pan ticket na ka VPP u iohi ba u donkam ban leit sha ki paidbah tang da kane ka lynti kaba khuid ban shakri ia u paidbah”.
“Ka VPP kam ju ai ticket matlah, lane tang ba u dei u MDC ba dang don ha ka shuki kan suk ban jop, kam long kumta, namar ka VPP ka dang lah ban sei da u briew u ba tlot u ba ka party kan pynjop, khnang ba un sngewthuh ba u jop na ka party bad kan kiar ban ai ticket sha u briew u ba ong ba nga khlain, namar nga don vote 4000 -5000 tylli, ngi tieng ban ai ticket ia kum kita namar ynda ki la jop kin kam ba ka dei na ki ba ka VPP ka jop bad ynda la jop sa leh katba mon ngin ym kwah ia kata” u la bynrap.
U la ong ba na ki 58 ngut ki kyrtong kiba ka party ka la rai ban ai ticket, don tang uwei u MDC u ba dang don ha ka shuki, te kumno kin kynnoh ba “old wine in new bottle”? Kane ka dei tang ka jingkren pynkut ka bym don nongrim eiei ruh em.
“Ha Jaintia Hill kumba la kam da kiwei ki party, ba khlem pisa, khlem kyiad, ym long ban iakhun election,ka VPP ka wan da ka jing pynshai ka jing pyn sngewthuh paidbah bad u paidbah u ai ka jing kyrshan, ngi kmen ia u paidbah ba u kylla ka jingmutjingpyr khat namar kane ka dei ka phang Jong ngi “.
U la bynrap “Ka VPP ka sngewtynnad ia ka jingmut jing pyrkhat jong uwei u MDC, u ba la jied ia ka lynti jong ka VPP, ba nangne shakhmat un shakri ia ki paidbah bad ngin jin da kmen ba lada kiwei ki nongialam ruh kynthup ia u Myntri Rangbah ba kin kylla kaba mut bad kin ong ba ngin shakri hok ia u paidbah ngin ym bam sap shuh, ngi ruh ngi kloi ban shongthait noh, hynrei ym dei ban pynbieij ia u paidbah tang ban jop election”.
Kum u paitbah to ngin ailad sa ia ki mdc ha ka ne ka kynti ngin peit au ba kin leh lada Kim trei hok pat ngin change pat ha ka wei pat ka pali ka ban dang wan ha ka ba mynta te long live beit vpp to iai trei hok kumba phi trei mynta khnang ba ka jait bynriew kan Im biang sa shisien..