“Kaei kata ka UPA? Kam don satia ka UPA” ong ka Mamata; sangah ka Mamata ia ka Sonia Gandhi

Mumbai:”Kaei kata ka UPA(United Progressive Alliance)? Kam don satia ka UPA” ong ka Mamata Banerjee, myntri rangbah ka West Bengal, myn hynnin ka sngi, hadien ba ka la ia kynduh ia U Sharad Pawar, President jong ka seng Nationalist Congress Party (NCP).

Ka jingkren jong ka Mamata, ka dei haba ka don ha Mumbai, ha kaba ka don na ka bynta lai sngi, ha katei ka nongbah bad ba ka ia kynduh ia ki nongialam ka NCP bad ka Shiv Sena.

Haba kren ia ki kotkhubor, ka Mamata Banerjee, ka pynsngew, ba ka donkam, ka kynhun kaba khlain bor bha, ban ialeh pyrshah ia kane ka rukom synshar thombor ha ka Ri.

“Ka donkam ka kynhun kaba khlain bor bha, namar ba ym don mano mano ruh, ba ialeh pyrshah ia kane ka jing synshar thombor. U Sharad, u dei u nongialam uba radbah tam bad nga kwah ban iakynduh bad iakren halor ka sain hima sima bad nga mynjur, ia kaei kaba U Sharad u ong. Ym don UPA satia” ong ka myntri rangbah jong ka West Bengal.

Kham mynshwa, ka Mamata Banerjee, ka kren shai, ba lada baroh ki seng trai ri, ki ia tylli lang, kumta ka jing pynrem ia ka BJP, ka dei kaba suk shi katdei.
Ka Mamata, ka la ia kynduh ia U Sanjay Raut bad ia U Aaditya Thackeray, kiba dei ki nongialam ka Shiv Sena, hynnin ka sngi.
Ka jingkren jong ka Mamata, ka thew ia ka seng Congress, namar ba ka jingthaw ia ka UPA ruh, ka dei kaba la lam khmat da ka Sonia Gandhi, President jong ka seng Congress.