Kaei kaba U Bah Pynshngain u ong; U Bah Pala ruh u ong kumta: Pala

Shillong, 02 Nailar:
Shen mar ia dep iakren bad u Bah Pyn-shngain N Syiem na jaka ba u la shah interbiw ha ki heh ka AICC hynne ka sngi, u la leit iadih sha lang ha ka kamra ba iadonlang u Bah Vincent H Pala bad kiwei ki MDC ka Congress.
“Phi sngew kumno Bah Pala ia ka jingkren jong u CEM Bah Pynshngain”, la kylli ki nongthoh khubor, bad ka jubab na u Bah Pala, “kaei kaba u Bah Pynshngain u ong, u Bah Pala ruh u ong kumta”.
Kane ka jubab na u Bah Pala ka long halor ka jingkylli ki nongthoh khubor halor  ka jingpynpaw u Bah Pynshngain ba ia ka jingbymler treikam kane ka sorkar hapoh ka jingialam jong u Dr Mukul Sangma.
Halor ka kam ban dawa bujli nongialam ha ka party, u Bah Pala, u la ong ba ka shong ha ki MLA ban shim ia ka rai bad ma u, um don bynta eiei halor kane ka kam.
U Bah Pala uba iashong lang ha syndah bad u Bah Pynshngain ha katei ka por u la ai mynsiem ia u da kaba, “u Bah Pynshngain un thikna ban ioh beit ia ka tiket 2018 na ka Congress bad un nym shah beh satia ha ka seng lada um tam ia u pud ka party”.