KAEI KA JAID BYNRIEW KABA SUK?

AIS SUJA

Kaei ka jaid bynriew kaba suk? Ka ktien u Blei ka ong – “Suk kata ka jaid bynriew kaba U Trai u long u Blei jong ka’.Salm 33:12. Kane ka dei ka kitab salm U David. U David u la long u syiem halor ki Israel ha u snem 1010 B.C kata hadien jong u syiem Saul u ba la synshar ha u snem 1050 B.C.

Kane ka ktien u Blei ka la kren halor ki Israel ha ka por u Syiem David ba lada ka jaidbynriew Israel, kum ka jaid bynriew ka ngeit bad kohnguh ha u Trai U Blei, kan long ka jaid bynriew ba suk tam. Kumta ngi iohi ba ka Ri ka suk shisha ha ka por u Syiem David bad hadien jong u la synshar pat ia ki Israel da u khun u David, u Syiem Solomon kein ha ka snem 970 B.C. Ha kata ka por ki Israel ki la long shisha ka Jaidbynriew kaba suk kaba pawnam namar ki syiem ki Nongsynshar jongka. Ki long ki briew kiba kohnguh bad sheptieng ia u Blei.

Haba u Blei u la jied ia u Solomon ban long u syiem ha Israel, U Solomon u pan tang kawei na u Blei bad kata ka long kaba u pan ia ka dohnud kaba sngewthuh ban bishar ia u paidbah Israel, u ong uei uba lah ban bishar kat une u paidbah jong me? 1 ki syiem 3:9. Hynrei kaba sngewtynnad ka long ba u Blei u Jubab ia u Solomon da kaba ong – Solomon Nga la ai ruh hame ia kata kaba mem shym la pan ia ka spah, bad ka burom, kumta ymdon u wei ruh hapdeng ki syiem uba kum mame ha ki sngi jong me 1 ki syiem 3:13.

Shisha ka hima Israel ka la long kaba suk tam ha kita ki por, namar ka jaidbynriew ka long kaba u Trai u long u Blei jong ka.
Hynrei ha u snem 930 B. C hadien ka jingiap noh u syiem Solomon, ka hima Israel ka la kad arliang, ki la thung ia u Solomon ban long syiem ha u snem naduh u 930 B.C haduh 909 B.C. Dei naduh kane ka por ter shiter la mih ki syiem ki bymsheptieng shuh ia u Blei, ki Israel kum ka jaidbynriew ki la nang pait nang pra bad la synshar ruh da kiba bun ki Syiem ki Hima halor jong ki, ka daw ka long ba ki Nongsynshar jong ki ki long kiba mane blei thaw ki bymsheptieng ia u Blei te ka Ri ka la jot la pra thiaw.

Ha ka por u Prophet Malakhi u Blei u la phah ia u Malakhi ban maham ia ki Israel. U Blei u ong – “Ngan wan hajan jong phi ka Jingbishar, Ngan long u Sakhi pyrshah ia kiba leh byrtong (lehksuid) pyrshah ia kiba klim, pyrshah ia kiba smai lamler, pyrshah ia kiba bein ia u nongbylla ha ka bainong jong u, ia ka riew kynthei, ia u khunswet, kiba pynkynriah noh ia u nongwei na ka hok ki bymsheptieng ia nga – ong u Trai ki paid. Malakhi 3:5.
Nakata kadaw ki Israel ki jot ki pra la pynsaphret kylleng ia ki jan haduh baki la jan duh jaid na ka sla pyrthei na kadaw ka jingbitar jong u Blei.

Ha kine ki sngi, ngi donkam ka jingduwai kaba jur ia ka Ri ka jaidbynriew, ia ki Nongsynshar ba u Blei un pynmih da kiba sheptieng Blei, ym kiba ban bein ia ki nongbylla ne ia ki riew kynthei, hynrei kiba peit bad bishar ha ka hok. Namar lada ki Nongsynshar ki long kiba mutlop, ki bymsheptieng Blei ka Ri ka jot ka pei ka pra ruh. Ka Ri kamlah ban long kaba suk lada kam pynshong nongrim ia ka Jingsynshar ha U Trai u Blei jong ka, namar ki jingsynshar baroh ki long na u Blei.
Nakata kadaw ka donkam iangi ban duwai jur ia ki Nongsynshar jong ka Meghalaya ne ka Ri India namar ka ktien u Blei ka kyntu ban duwai – ka ong To pyllong ki Jingkyrpad, jingduwai, jingiasaid naka bynta ki briew baroh (iaka jaidbynriew) bad naka bynta ki syiem kiba khraw batri baroh ba ngin ioh im ka jingim kaba suk ba jar jar ha ka jingriew Blei bad jingshida baroh. 1 Timothy 2:1-2.
Namar kata – suk kata ka Jaidbynriew kaba u TRAI U LONG U BLEI JONG KA. Salm 33:12. Amen.