Kaei bad shaei ka lawei jong ngi kan poi lada pynkylla noh ia ka Sixth Scheduled kaba mynta

Ki sengbhalang kum ka SOMALA bad ka KKNMS bad ki riew paidbah, ki la thoh pyrshah ia ki jingthmu ban pynrung ia ka Municipal Council bad elected Village lane Village Council hapoh ka Sixth Scheduled lyngba ka Sixth Scheduled Amendment Bill 2015 bad 2012. Ia ki jingthoh la phah sha U Prime Minister ka Ri India U Narendra Modi bad sha u Home Minister, U Rajnath Singh halor ka Amendment Bill 2015 bad sha U Home Minister Sushilkumar Shinde halor ka Sixth Scheduled Amendment Bill 2012.

Halor ka Sixth Scheduled Bill 2015, ka Sorkar India lyngba ka Union Cabinet ka la mynjur ia ka Amendment ia ka Sixth Scheduled Bill 2015 na ka bynta ki 10 tylli ki North East Autonomous Council.
Ka rai ka Union Cabinet na ka bynta ka Meghalaya ka long ba “ Ia mynta shipor la pynsangeh lane pynsah teng ban pyntrei kam ia ki kyndon kiba ia dei bad ki elected Village bad Municipal Council bad ia ka reservation ia ki kynthei kaba long shibynta na ka laibynta”.

Kaba sngew lyng ngoh bad sngew shaiong ngain ka long ba hadien ka rai jong ka Union Cabinet ban pynsangeh lane pynsahteng ban pynrung ia ki kyndon ka Municipal Council bad elected Village hapoh ka Sixth Scheduled jong ka Meghalaya, pynban ka Sorkar Meghalaya lyngba ka kot khubor phareng tarik 27th August, 2022 ha ka kyntien (Caption) ka ba ong “Sixth Scheduled Set for Change” ka la ai jingmut biang ia ka Sorkar India sa shisien pat ban pynrung ia ka Municipal Council bad elected Village hapoh ka Sixth Scheduled jong ka Meghalaya ka ba long pyrshah ia ka jingsngew jong ki Sengbhalang bad ki paidbah kiba la thoh pyrshah mynshuwa shaduh Delhi. Ka Union Cabinet ruh kala dep pdiang bad dep rai shaphang ka Municipal Council bad elected Village ban nym pat pyntrei kam ia ki kum ba la kdew haneng.

Ka jingpynrung ia ka Municipal Council bad ka elected Village hapoh ka Sixth Scheduled mynta kan pyn jyrsieh bad pynduh pyndam ia ka Sixth Schedule jong ka Meghalaya kaba mynta. Ki Municipal Council kin wan rah bun tylli ki municipality ki barit ki ba long kum ka Shillong municipality ha man la ki shnong heh kum ka Mairang, Nongstoin, Sohra, Nongpoh bad ter ter.

Ka Municipal Council kan long trai halor ka khyndew ka Shyiap hapoh u pud u sam jong ka, kumba long haka Shillong Municipality. Ki elected Village lane ki Village Council kin wanlam ia ka Panchayati Raj hapoh ka Sixth Scheduled ki ban pynkhyllem bad jynrat ia ki Dorbar Shnong, ia ki Hima Syiem bad Dolloi bad ka District Council kan kylla long tang ka nam ka kyrteng khlem iktiar.
La da ki jing tyrwa ka Sorkar jylla kat kum ha ki kyntien “Sixth Scheduled Set for change” kan urlong ngin sa duh noh ia ka Sixth Scheduled ka ba mynta ka ba ai jing iada ia U riewlum bad ngin sa long khlem jing iada ha ka long briew man briew, imlang sahlang bad ha baroh ki phang.
Ka jingkylli ka long kum ka jaid bynriew rit-paid hato ngi lah mo ban im khlem ka jing iada ka Sixth Scheduled ka ba mynta? Da lei lei ngim dei ban duh noh ia ka Sixth Scheduled kaba la iada ia ngi baroh shi katta. Ngi ngeit ba ka Ri bad ka jaid bynriew ka sngewthuh bad tip ia kane ka jingshisha. Kumta ngim dei ban khap brip la ki khmat bad shong kli kti haba ka jingma ka ap ban tyllep ia ka Ri bad ia ngi shimet ruh kum juh.

Sd/-

(W. Anthony)
Convener SOMALA
Jaiaw Langsning, Shillong.