Shillong: U bah A.L Hek u MLA ba la risaiñ noh dang shen, uba la leit ban ia soh mynta sha ka seng BJP u la ong ba ka shong ha ka seng bad ha ki MLA ban jied ia u Myntri rangbah ka jylla, hynrei u la ong ba lada ka seng ka ibit ia u, u kloi ban shimti kum u nongialam. “ Lada ka Party ka ibit nga long uba la khreh ban shim ia ka shuki Myntri rangbah” ong u bah A.L Hek.
Halor ka jingkynnoh ba ka BJP ka dei ka seng kaba leh beiñ ia ki rit paid khamtam ia ki Kristan u bah Hek u la kyntait ia kane bad u la ong ba kiba kum kitei ki jingjia ki lah ban jia ha kano kano ka jaka ruh hynrei kam mut pat ba ka don kaba kum katei ha ka jingtreikam jong ka seng BJP. “Ha Mylliem ki don kiba leit pynpra ia ka jaka thang briew jong ka Seng Khasi hynrei kam mut pat ba ki Kristan ki thombor ia ka Seng Khasi, ki don beit ki runar hangno hangno ruh, kaba la jia ha Satna ruh kaba ki Lyngdoh niam ki la shah hiar thma ka dei tang ka kam ki runar kiba kwah pynthut ia ka shongsuk shongsaiñ” u la ong. U la ong ba ka don beit ka jingiakynad hangno hangno ruh hynrei ym dei pat ban kynnoh ia ka Party.
U Bah Sanbor Shullai, Bah Justine Dkhar, Bah Robinus Syngkon, Bah AL Hek, kiba shah shondur ha khmat ka ophis jong ka dorbar Jylla, ha ka por ba ki iehnoh ia ka jinglong MLA, ha U Kyllalyngkot 2018.