Shillong 23 Lber: Ka “Soft Skills and Wellbeing Winter Camps” hapoh ka bynta “ia ka Mynried” ba la kyrshan da ka bor synshar District jong ka East Jaiñtia Hills lyngba ka District Mineral Foundation, ki la kynthup ïa ki 11 tylli ki jaka pule ha kaba 1,826 ngut ki samla pule ki lah ioh ia ka jinghikai haduh kine ki sngi. Ia ki jingsam sertiphikate la pynlong ha ka sngi thohdieng ba la dep ha Iongkaluh na ka bynta 247 ngut ki khynnah skul jong ka St. Peter Secondary School bad ha Byndihati na ka bynta 126 ngut ki khynnah pule jong ka Sacred Heart Secondary School, bad 315 khynnah pule jong ka Byndihati Secondary School. Ka kong Santa Mary Shylla kaba dei ka dkhot jong ka Ïing Dorbar Thawaiñ ka Sutnga-Saipung Konstitwensi ka la ïa don lang kum ka Kongsan ha kane ka jingialang kaba long ha iingskul Sacred Heart Secondary School, Byndihati.
Kane ka jingialang lah pynwandur na ka jingthmu jong ka sorkar jylla ban the lakam ia ki jingdih buaid hapdeng ki samla shynrang bad kynthei, ïa ki camp la shna khnang ban pynïasoh ïa ki samla ha ki kam ban pyntbit ialade bad ban khien kor ialade ruh. Ka jinghikai ka la pyndonkam ia ki interactive sessions lane ban iathir iatai, ka jingiathuhkhana bad ki rukom pynlong jinglong jingman ka sngi, ban nang ban kren.
La ai kyrteng lah ai “ia ka Mynried” kaba pynkylla na ka ktien Pnar sha “na ka bynta ka lashai kaba kham bha”, kane ka Winter Camp ki la ai ruh ia ka lad ia ki samla pule ban pyni ia ki sap ki phong jong ki, ban pynskhem ia ka jingsngewrit bad ban iarap ia ki nongiashim bynta ban ithuh bad rakhe ia ki jinglong jong ki shimet.
Ki nongiashim bynta ki lah shim ruh ia ka Wellbeing Pledge ban ialeh pyrshah ia ki jingdih pynbuaid.
Graious Phawa, Class 8, jong ka St. Peter’s Secondary School, haba batai shaphang ka jingsjem jong ka ha Iongkaluh – “Kane ka prokram ka la iarap shisha ban tei ia ka jingshaniah bad jingsngewthuh jong nga shaphang ka jingkoit jingkhiah ha ka met, ka jingmut jingpyrkhat. Nga ai khublei ia u DC bad ki staff jong u kiba la ai ia ngi ia kane ka programme.”
Haba kren ha ka jingïalang, ka kong Santa Mary Shylla, MLA ka Sutnga-Saipung Constituency ka la ong, “ki winter camp ki la wanrah ïa ka jingmyntoi ha ka District namar ba ki samla pule ki la ïoh ïa ka jait jinghikai kaba lah ban kyntiew ïa ka jingim jong ki.Nga kyrpad ïa iwei pa iwei i samla pule ba kin shim ïa kane kum ka bynta ban long ki briew kiba kham bha.”
Kum ban shu pynkynmaw, kane ka bynta ka kyrshan ia ka jingthmu jong ka state ban ialeh pyrshah ia u droks, ka Drug Reduction Elimination & Action Mission (DREAM).
Shivansh Awasthi, IAS, Deputy Commissioner, East Jaintia Hills, ha ka jingkren jong u, u ong, “Nalo ria ka jingai jinghikai ha ki kam bapher bapher, kawei ka mat ba kongsan jong kane ka programme ka dei ban ithuh ia ki sap ki phong ba ki khynnah ki don.”
Phi don ban ong eiei?