Ka Wahlyngkhat kum ka shnong kaba lait na ka jingleit bar pathar

Wahlyngkhat, 11 Lber: Ka 11 tarik u lber ka dei ka sngi sah kynmaw na ka bynta ka shnong Wahlyngkhat naba ha kane ka sngi la pynbna ia katei ka shnong kum ka shnong kaba lait na ka jingleit bar pathar bad ka shnong kaba la biang ki painkhana ban leit shabar ne ka Open Defecation Free Village. La pynbna ia katei ka shnong kum ka shnong ODF da u BDO ka Pynursla C&RD Block u bah PS Tynsong ha ka jingialang paidbah kaba la long ha madan phutbol ka shnong Wahlyngkhat.
U Secretary jong ka shnong Wahlyngkhat u bah Marvelous Khonglam u la iathuh ia ka khana lyngkot jong katei ka shnong kumno ba ka la ioh ia kata ka nam kum ka shnong kaba lait na ka jingleit bar pathar. U la ong ba ka Wahlyngkhat ka dei ka shnong kaba hap hapoh ka Raid Nongblai bad la sdang nyngkong ia ka jingpynkhuid shnong ha katei ka shnong dei ha ka 2 tarik u risaw, 1990 bad hadien kata ha u snem 2006 ka dorbar Shnong ka la shim ia ka rai ban ym shah shuh ia ki nongshong shnong ba kin pyllait pathar ia ki sniang hapoh shnong hynrei ki dei ban set khop hapoh sem lajong bad ha juh utei u snem u la ong ba la rai ba baroh khoit ki longing ki dei ban don la ka jong ka jong ka painkhana. Ha utei u snem u la ong ba la buh ia ki jaka bret niut ha kylleng ki jaka bad la maham ia ki nongshong shnong ban bret pathar ia ki niut bad ki jaboh hynrei ki dei ban bret ha ki jaka ba la buh bad la hukum ba kin bret ruh ha ki thliew ba la tih kyrpang.
Hadien 10 snem naduh ba la shim ia kitei ki rai la lah ban wanrah ia ka jingkhuid jingsuba hapoh katei ka shnong tad haduh ba ka la ioh ia ka nam kum ka shnong kaba lait na ki jingleit bar kulmar bad kiba lait na ki jaboh ne kata ka Open Defecation Free ( IDF). Shuwa katei ka jingialang u bah Tynsong BDO ka Pynursla u la plie paidbah ia ka jaka leit shabar paidbah hapoh ka shnong kaba don harud jong ka surok bah.
Ha katei ka sngi la pynshongshit ia ki kynrem ki lyndan da ki jingpynbyrngia ba bunjait na ki khynnah skul jong ka Tbeh Jingshai L.P bad Upper Primary School, Wahlyngkhat bad shuwa ban pynkut ka jingialang la aiti ia ka syrnod kum ka shnong ODF da u BDO ha u Rangbah Shnong katei ka shnong u bah Wankloi Khonglam. Nalor u BDO kiwei pat kiba ai jingkrne ha katei ka sngi ki kynthup ia u Mark West Kharkongor (State Consultant SBM), ka kong Eva Buhphang ka District Co-Ordinator, u bah A.S Marbaniang bad kiwei pat, la don lang ruh ki ophisar na ki tnad sorkar bapher bapher kiba don ha Pynursla , u OC ka Pynursla u bah M.Rymbai bad ki kynhun jong ka Swachh Bharat Mission.