Shillong:U National General Secretary ka NPP bad Symbud Myntri Rangbah Bah Sniawbhalang Dhar, ula kynnoh ba ka seng Congress ka dei kaba la don ha Intensive Care Unit (ICU) bad kan long lehnohei ban jied biang ïa u kyrtong bad MP ba mynta u Bah Vincent H Pala na Shillong Parliamentary Seat.
Katkum ka jingong jong u, kan long leh nohei ruh ïa ki paidbah ban ai vote ïa ka Voice of the People Party (VPP) bad ka United Democratic Party (UDP) namar kine kin kut tang ha Byrnihat bad kin ym poi shano shano ruh.
Haba kren ha ka jingïalang kaba long ha Byrnihat, Ri-Bhoi ban pan ïa ka jingkyrshan ïa ka kyrtong ka NPP na Shillong bad Myntri Sorkar kong Ampareen Lyngdoh, u Bah Sniawbhalang ula ong ba kin don 4-5 ngut ki kyrtong, ki ban ïakhun ïa ka ilekshon Lok Sabha na Shillong.
“Hynrei, u kyrtong ka UDP un nym poi shano shano ruh bad u kyrtong ka VPP kumba phi ïa tip, un kut tang ha Nongpoh (Byrnihat),” ula ong.
Ula kynnoh ruh ba ki Nongthep vote, khamtam ki Garo bad ki bar jylla, kin ym jied satia ïa kine ki artylli ki party.
Haba kynnoh ba ka Congress ka dei ka jhad kaba la ngam, u Bah Sniawbhalang ula ong, “Ka Congress ka dei ka party, kaba la don mynta ha ICU bad ngam tip kaei ka ban jia ïa ka. Kane ka Party ba la rim duh hapoh ka Ri ka la don satang 5 ngut ki MLA ha Meghalaya. Ka Party kaba ju synshar ha ka Sorkar Pdeng, kaba la ïoh shisien haduh 543 ngut ki MP hynrei ka la don satang 40-50 ngut bad ha kane ka ilekshon ban wan, ngam tharai ba kan tam wat ïa ka 40 seat. Kumta, balei ngin phah biang ïa u MP ka congress. Lada ngi phah ïa ka Congress, ngi la ïakhun ïa ka thma kaba la rem lypa”.
“Namar kata, nga kyrpad ïa ki paidbah ba ka lynti ïa mynta ka dei ïa phi ban vote ïa ka NPP kong Ampareen Lyngdoh,” ula ong haba bynrap ba ki paidbah ki tip bha ban bishar ïa ka jingtreikam jong u Bah Vincent Pala ha kine ki 15 snem ba la leit noh.
Ha kajuh ka por, u Bah Sniawbhalang ula pyntip ba kum u Myntri ka Tnat Transport, ula shimkhia ban ïakren bad ka Sorkar Pdeng ban mang pisa ha kaban shna ïa ka surok 8 lane na Khanapara sha Byrnihat bad ka surok 4-lane na Umroi sha Ri-lum Jaiñtia khnang ban pynkylluid ïa ka jingïaid ki kali bad lait ka dheng.
U Symbud Myntri Rangbah ula ai jingïaroh ruh ïa u MLA ka Jirang u Bah Sosthenes Sohtun halor ka jingtrei shitom ban wanrah ïa ka roi ka san hapoh ka constituency. Ula ong ba une u MLA u ju ïapyni nia wat bad u Myntri Rangbah manla ka janmied ban ïoh ïa ki kam pynroi hapoh ka constituency.
Ïa kane ka jingïalang la pynïaid da u MLA ka Jirang bad la wan ïashimbynta da ki Nongïalam bad ki nongtrei jong ka party na kylleng ka them Ri-Bhoi.
Ka NPP mynta ka don ha Intensive Critical Care Unit (ICCU)
ngim donkam bn pule bd sngap shuh ia ki khubor kynthoh,nmr la dier por, hynrei ngin pynjop donburom tang ia I Dr. Syngkon.. North, East, South, West, VPP is the best
Lada ngi dang biej NPP-UDP-HSPDP-congress-BJP kynmaw uba jingjar u dang jingjar shuh2 bad uba tuh u dang ioh tuh shuh2..ki kam contract, ki kam dewiong,ki kam development, ki kam sniew,ki suicide, ki unemployment, ki jingshah pyniap ki.khasi,ki jingshah leh tohmet ki khasi ha ki pulit khasi,ki kam corruption kan dang kiew shuh2.
Lada phi kwah ka jylla ban synshar ki nong ieid shuwa iaka ri bad jaidbynriew jied VPP mynta