Ka VPP, kan ym ïatreilang satia bad ka NPP, ong u Bah Ardent

Shillong:U nongïalam ba Rangbah jong ka seng Voice of the people’s party (VPP) u Bah Ardent Miller Basaïawmoit uba la long ruh mynta u MLA ka Nongkrem Konstitwensi u la kren da kaba shai ba ka seng VPP kan ym ïatreilang satia bad ka NPP, namar naduh shwa ban ïakhun ïa ka ilekshon ka NPP ka la shah kynnoh ba la jur palat ka bamsap.

Ïa katei u la kren sha ki lad pathai khubor hadien ba la pynbna jop bad jop haduh 4 ngut ki kyrtong jong ka seng VPP.
“Kane ka jingjop ka long ka lynti kaba eh kaba ngi ïakhun khlem pynlut pisa, kane kadei ka jingthmu jong u Blei, kane kadei ka jingthrang jong ki paidbah ban wanrah jingkylla,” ong u Bah Ardent.
U la ba watla ka VPP ka la ïoh ban mih tang khyndiat por ban pynkhreh ban ïakhun ïa ka ilekshon, hynrei ki paidbah ki la pyni ba ki ieid ïa ka seng bad khamtam eh ïa ki nongrim kiba ka seng ka la buh kata ban ïoh ka synshar khadar kaba khuid kaba suba, u pud u sam, ka kyrduh kam, ban rat dyngkhong ïa ka bamsap bad kiwei.

“Ka la long tang hapoh 3 taïew namar ka jingslem ban ïoh ïa ka registration bad ban ïoh ïa ka shap, hynrei namar ki kam phylla U Blei bad ka jingieid jingkyrshan ratbah ki paidbah ki la pynjop ïa ka VPP kumba 4 ngut,” u la ong.
Haba bynrap biang ba ka VPP kan ym ïatreilang satia bad ka NPP, u Bah Ardent ula ong, “Ngin ym ïatreilang bad ka NPP, bad ïa mynta ngim pat ong la ngin don sha ka liang synshar ne pyrshah hynrei na ka bynta jong ngi ngim lei lei la ngi don ha kano kano ka liang.”

Haba kylli biang haba ïadei bad ka jingïatreilang bad ka NPP utei u nongïalam ka VPP u la ong, “Kumno ym khmih lynti ban ïatreilang bad ka NPP haba bun ki jingkynnoh bamsap, ym don jingtohkit, bad ïano ngin kyrshan ngin sa peit kiei kita ki kynhun kiba donkam ka jingkyrshan jong ngi bad kita ki kynhun kiba donkam ïa ka jingkyrshan jong ka VPP kidei ban mynjur ïa ki nongrim bad ki mat bad kino kino kiba pdiang ïa ki mat ka VPP, ngin sa shim ka rai.”
U la ruh ba ka VPP ka kwah ban ïohi ba ki seng riewlum kin ïalam ïa ka sorkar.

Haba kylli la u sngew kumno ba ka VPP ka khlem pynïeng kyrtong ha baroh ki Konstitwensi u Bah Ardent ula ong, “Ngim babe ba ngi khlem lah ban pynïeng ha baroh ki Konstitwensi, ka por ruh ka long tang lai taïew ban pynkhreh ïa ka ilekshon. Ka jingslem ban ïoh ïa ka registration bad symbol ka la ktah ba ngi khlem jop bun seat.”
Haba kylli la ka jingrwai u Prah kadei ka daw bah ba la pynkhih win ïa ka ilekshon ka VPP u Bah Ardent ula ong, “Ka jingrwai kan ym pynkhih lada ka party kam don la ka nongrim, ka jingwan ka jingrwai ka la nang ïarap pynwandur ïa ka nongrim jong ka party, bad kumba long mynta kiba bun ki kyrtong kiba la phone ban ïaleh noh ïa ka MDC na ka VPP hynrei ka seng jong ngi kamdei kaba shu pdiang ruma hynrei ngin hap peit kiba kumno bad da kano ka lynti yn ïaid.”

Haba kylli shaphang ka jingkynnoh ba ïa ka VPP la bei tyngka da ka AITC, na ka liang u Bah Ardent ula ong, “Lada kiwei ki party kim lah shuh ban poi sha ka thong ki kynnoh bun jait, ki pynthohbria, ki la shu kynthoh, bad kane kadei ruh tang ka nia ilekshon kiba mih na ki party ba la rim.
Halor ka jingkylli pat la ka VPP kan pynïeng kyrtong ne em napoh Sohïong Konstitwensi u Bah Ardent ula ong, “Haba ïadei bad ka Sohïong ngin sa peit ïa ki rule jong ka tnat Election Commission ka India kumno ka pynïaid.”