Ka VPP kam pat ju synshar, ki briew ki sngew ba kan synshar bha, ong u bah Paul

Shillong:Haba bishar bniah ia ka jingbym lah jong ka United Democratic Party (UDP) ban jop bun ki MDC ha ka Election na ka bynta ka Khasi Hill Autonomous District Council (KHADC) bad Jaintia Hill Autonomous District Council (JHADC) u Myntri Sorkar u ba long ruh u MLA ka UDP u Bah Paul Lyngdoh u la ong ba ka ‘Jingpyrshah Sorkar’ ka dei kawei na ki daw ba ka UDP ka khlem lah ban lehbha ha ka ilekshon sha ki Autonomous District Council (ADC) ha Rilum Khasi bad Jaintia.

Haba kren sha ki lad pathai khubor u Bah Paul u la ong ba ka jingbym lah leh bha ka dei namar ka jingpyrshah Sorkar naba ki briew ruh ki sngew ba ka party thymmai kan kham synshar khuid, kumta ki la ai ka jingkyrshan ba pura ia ka VPP.
Haba ia nujor ia ka MP election bad ka MDC election ka UDP ka la kiew bha ha ka jingioh vote, namar ha ka Lok Sabha election la iohi kumba ka UDP kan sa shah pynduh pyndam noh, hynrei mynta ka kynti ka don ka jingkiew wat la kam dei pat kaba la lah ban wanrah jinghun ia ka party.

Haba bishar ha ka Constituency ba u bah Paul u long MDC barim bad ka jingshah rem noh u kyrtong ka UDP u la ong “Haba ngi phai sha ka jingioh vote bad namar ba ka kynthup ia ki ar tylli ki Constituency, ki polling station ha West Shillong ka VPP ka tam tang 600 tam vote kat ba ha ka MP election pat ka UDP ka wan khadduh, hynrei ha North Shillong hi ka UDP ka tlot palat”.
U bah Paul Lyngdoh u la ong ruh ba ka jingpyrshah sorkar ka dei kawei ka mat kaba pynduna vote ia ka UDP namar ki briew kinsngewba ka VPP ka dang thymmai bad kam pat don ha ka bor kumta kan lah ban synshar bha.

“Phi tip bha ba ka VPP kam pat ju wan ha ka bor kumta ka suk palat lada phi shu shong na gallery ban kdew hangno ka iaid bakla ha madan hynrei lada phi la don slem ha madan, ki briew kin sa lah ban kdew ia ki jingbakla jong phi” u la ong .
U la bynrap “Phi hap ban trei bha hynrei ka VPP haduh mynta kam pat ju iohbat ia u lakam ka jingsynshar. Kumta, ka long kaba suk ban ong ba ngi dei kiba khlem bor bad ai ha ngi ia ka bor bad ngin ai ka jingshakri”.
U Bah Paul u la ong ba ka UDP kam shym la lah ban leh bha ha kane ka election, kumta na ka party hi shen kan sa lum da ka jingialang bad baroh ki nongialam bad ki nongkitkam ban iakren ia ki jingmih na ka ilekshon ADC bad ban wad ki lad ki lynti ban pynkhlain ia ka party.

Lah ban kdew ba ka UDP ka la jop tang 5 Seat ha ka ilekshon shaka Khasi Hills Autonomous District Council (KHADC) bad 3 Seat sha ka Jaintia Hills Autonomous District Council (JHADC).
U nongialam ka UDP u la pynpaw ka jingiaroh ia ka Voice of the People Party (VPP) kaba la jop 17 Seat ha KHADC bad 8 JHADC bad u la ong “Ka la bha palat mynta ba ka (VPP) ka la don ha ka kyrdan ba biang eh ban ialam ia ka EC hapoh KHADC. Nga kitbok ia ngi bad kitbok ruh ba kin lah ban pyndep iala ki jingkular”.