Ka VPP kam don mat shuh da kiwei, ka shu kynnoh bam sap, ong u bah HM Shangpliang

Shillong:Katba nang mih ki sngi ka saiñ pyrthei ka la nang khluid ha kaba ka jingkynthah kawei ka seng saiñ pyrthei ïa kawei pat ka la nang thnam ha kane ka kynti kaba mynta ruh u nongaiktien ka National People’s Party (NPP) Bah Himalaya M Shangpliang ula kob ïa ka liang pyrshah Voice of the People Party (VPP) ba kan ujor da ka ejahar lane thoh sha ka sorkar pdeng ban phah tohkit ha ka CBI pyrshah ïa ki nongïalam ka NPP, lada ki dei kiba bamsap.

“Ka long kaba suk palat ban shu kynnoh ïa ka party ba ka bamsap. Nga kyntu ïa ka VPP ba lada phi sngew ba ki Nongïalam ka NPP ki dei kiba bamsap, nga kyrpad ïa ki ba kin sngewbha ujor da ka ejahar ha ki Police Station ba marjan lane thoh sha ka Sorkar Pdeng ba kan thung ïa ka jingtohkit CBI lane ka Enforcement Directorate lane kano kano ka Central Agency, sngewbha khot ïa ki bad ai ba kin tohkit ïa kum kine ki riew bamsap kiba don hapoh ka party,” ong u Bah Himalaya haba ïakren bad ki nongthoh khubor.

Haba pynpaw ba ka VPP kam don mat ïakren shuh da kiwei pat tang ka jingkhot ïa ka NPP ka party ba bamsap, une u MLA barim ka Mawsynram ula ong ba kane kam dei shuh ka mat thymmai ba ka VPP ka kheiñ ïa ka NPP kum ka party ba bamsap lane ba ka Sorkar ka dei kaba pynïaid da ka NPP ka dei kaba bamsap.
“Ka dei ka kam kaba la ïaid la slem bad kine ki dei ki slogan ilekshon ïa kaba ki pyrshang ban ïoh jingmyntoi na ki. Hynrei nga ong tang kawei, ka VPP kam don mat da kiwei pat pyrshah ïa ka NPP lait noh na ka jingkhot kum ka party ba bamsap, balei namar ka NPP ka la leh bha bad ka NPP ka la pynïaid bha ïa ka Sorkar bad ka NPP ka la wanrah shibun bah ka roi ka san na ka bynta ki paidbah bad kam don jingkylli, kam don jingartatien halor kane, ka NPP ka dei ka party kaba thmu na ka bynta ki paidbah ka Jylla,” ula ong.

“Ki don shibun bah ki skhim ba kane ka Sorkar ba ïalam da ka NPP ka la leh na ka bynta ki paidbah. Ngi lah ban ïohi ba ka Sorkar ka la pynïoh palat 3000 km ka surok ha ki shnong nongkyndong tang ha kine ki san snem ba la leit noh. Nga hap ban ïathuh ïa phi ba kane ka Sorkar ka la wanrah ïa ka song pisa ba kot haduh T. 14,000 klur bad la pynlut ïa ka na ka bynta ka skhim MGNREGS kaba aikam 100 sngi ïa ki briew ba don job card. Ka jingpynïoh kam ïa ki samla bad hapoh ka CM Elevate lane hapoh ka PRIME, kila don bun bah ki skhim bad palat 5000 ngut ki samla kila ïoh jingmyntoi na ka PRIME, phi lah ban mutdur ba ki dang don shibun kiei kiei kiban dang leh,” ula bynrap.

Da kaba ong ba ki paidbah ban kyntait ïa kum kitei ki jingkynnoh jong ka VPP, u Bah Shangpliang ula ong, “Nga kwah ban kyrpad ïa baroh ha ki 36 tylli ki constituency ba kine kiei kiei ki dei tang ki buit ilekshon, ki dei kiba khlem nongrim bad kim don satia ïa ka jingshisha bad kumta, ka VPP kam don mat da kiwei pat lait tang ban khot ïa ka NPP kum ka party ba bamsap”.
Ha kaba iadei bad ka jingkynnoh ba ka Sorkar NPP ka dei ka Sorkar ïa ki high level, u nongaiktien ka NPP ula ong, “Kane ka dei ka jingkren kaba la rim bha ïa kita ki high level. Nga kwah ïa ki ba kin leit sha ki shnong ki thaw, sngewbha leit sha ki shnong ki thaw kumba nga la kdew, leit sha ki jaka nongkyndong, wad na ki paid nongkyndong la ki la shah pynduh ïa kum kine ki jingmyntoi. Mynta, ki paid nongkyndong, kane ka dei ka sien ba nyngkong ha ka histori ka Meghalaya ba ngin sa ïoh palat 1 lak tylli ki ïing PMAY ïa ki longïing ba duk ha Nongkyndong. Ngi trei na ka bynta ki paid ba duk ha nongkyndong, ngi sngewkhia ba ki briew ki khot ïa ngi ki high level ne low level, kam don satia kaba kum kata”.

“Kumba nga ong, lada palat 1 lak ki ïing ha nongkyndong ki leit sha ki paid ba duk ha ka Jylla, mano ban ïoh jingmyntoi, kin dei ki paid nongkyndong. Lada 3000 km ka surok ladei ban siang ha ki jaka nongkyndong, mano ba ïoh nong, ki lad pynïasoh jongno kiba la poi sha ki shnong kiba don sha kyndong eh jong ka Jylla bad lada T.14000 klur la pynlut ha ka MGNREGS skhim, mano ba ïoh jingmyntoi, ki lynti ïaid kjat, ki ïingdorbar shnong, ki ïing skul, ki madan ïalehkai, baroh kine ki dei na ka skhim MGNREGS ha ki shnong, mano ba ïoh jingmyntoi, ki dei ki paid nongkyndong kiba ïoh jingmyntoi,” ula bynrap.
Haba pynpaw ba bun ki skhim ba kum kine kin sa wan ha une u snem ba mynta, u Bah Shangpliang ula ong, “Kumba phi tip baroh ba kane ka Sorkar ka dei ka Sorkar u paidbah bad na kata ka daw ka la dep ban mynjur ïa ka mang tyngka ba T. 27,000 klur ha kane ka snem mang tyngka ba mynta”.