Ka VPP kam ai tiket ia u bah Mayborn, namar ba u ai jait sha ka kmie, ther u heh UDP na Mawphlang

Shillong:U nongialam ka UDP na Mawphlang konstitwensi, u bah Rangshap Kurbah u la ther tyngeh ia u nongialam ka Voice of the People Party (VPP), u bah Ardent M Basaiawmoit ba u dei kum u nongpynpait jaitbynriew.

Haba kren ha ka jingialang ialap elekshon ha Mawngap ha ka sngi Saitjain, u la ong, ” U Bah Ardent M Basaiawmoit u ong, nga ieid jaitbynriew, kynnoh ia ki nongialam shnong, sengbhalang ba ki pynpait jaitbynriew, mano ba pynpait jaitbynriew, hato ym dei u bah Ardent M Basaiawmoit, ar liang u thlieh ia ka jaitbynriew, da kaba ai jait kpa bad ai jait kmie, bad na kata ka daw lada jop kine, ka jaitbynriew kan sa kylla bad kan poi ka por ka shong sang shong ma.Lada ai jait kpa, iano phin kam meikha, iano phin kam mei ieid. Wat ia kmen tohhoh, wat tur ruma”, la ong u bah Rangshap.

Shuh shuh u la ong ba la iohi ha social media ba ki nongialam ka VPP ki iakhih ha surok, katba ha assembly pat ki iapyrshah ba kren Hindi u Lat. “Hangne ha Mawngap, ha Marbi, dang bun ba nang kren Hindi ban ia ka phareng, ki nongleit iew ki iakren bad u dkhar ha Iewduh ia biang thik thik. Kaba sngew lyngngoh kita kiba dei ki nongialam ka VPP kim sngewthuh Hindi. Lada dei leit ba ki leit sha Parliament kim ia rung syndon baroh san snem ym tang ban mih shabar namar ba baroh ki iakren Hindi lut ha Parliament”, la ong u bah Rangshap.

U la ther ruh ba ki nongialam ka VPP ba ki kylla ktien ia kaei kaba ki la leh bad u la ong, “Ha ka por ba thep kyrteng u kyrtong VPP, haba kylli ki lad pathai khubor, phin leh kumno haba phi pyrshah ia ka ktien Hindi, uto u kyrtong VPP, u ong mano ba pyrshah. Haba ngi iohi ha Assembly u iapyrshah, u dang ong pat mano ba pyrshah, u ia jliah hi, u iaprie hi u ia nguid hi, na kata ka daw wat nym ngeit, kine ki briew ki long tang ban pynshongshit haba long jingialang kiwei, ki halla ha u Prah”.

U la ong ba baroh ha shnong Marbi, Mawngap, Mawphlang ki bat ia ka riti dustur ban ai jait sha I mei hynrei sngew thamula pat ban sngap ha social media, hana uba kwah ai jait kpa ruh long, ba kwah ai kmie ruh long, “Hato long mo, lada ai jait kpa, yn kam meikha iano, yn kam niakha iano”.
Ha kajuh ka por, u la ong ba kiba pyrta prah ki dei kiba shongshit ha surok ban pynthut haba long jingialang kiwei. “Ngim ju pyrta ngim ju pynwit haba long jingialang mano mano, namar ba ngi khein ba kum ia kito kiba pynwit, ki dei tang ki riewkai, kiba pynwit ia ka jingialang kiwei ki party, ki dei tang ki riewkai. Kynmaw ba u khiew uba thylli u riew bha, uba dap um, um sawa. Ka VPP kam ai tiket ia u Mayborn Lyngdoh, namar ba u ai jait sha kmie”, u la ong shuh u bah Rangshap.

Ha ka por ba shah weng iktiar ki rangbah shnong ha ka por ba long Myntri Rangbah u Dr. Mukul Sangma, u bah Ardent M Basaiawmoit u la jah, namar ba ki iadei shi paralok bad tang ban ioh vote, u la kynnoh ba ki Tymmenbasan ki sam kyaid por elekshon.
“Ki ong kylleng kylleng ba ka VPP ka dei kaba thymmai kaba khuid, hynrei thymmai tang ka party, u briew te lada dei kum ka dawai la kut por ruh, bad long kum u briew bym ju sum ar snem, phong da ka sala balieh shoit shoit”, u la ther shuh.