Ka VPP ka la hiar na ka 3.70 lak sha ka 2.71 lak vote, ha u 2028 ka lah ban hiar jain rynjain, ong u Sniawbhalang

Shillong:U nongialam ka NPP uba dei ruh u symbud myntri rangbah u bah Sniawbhalang Dhar ula ong ba ka seng Voice of the People Party (VPP) ka la nang hiar haba ianujor bad ka elekshon MP kaba dang shu dep khyndai bnai.

Haba kren sha ki lad pathai khubor, u bah Sniawbhalang u la ong ba ha ka MP ka VPP ka ioh 5.70 lak mynta pat ka ioh sa tang 3.71 lak eiei bad kane ka pyni ba ka la nang hiar katba ka NPP ka ioh 2.80 lak eiei ha kane ka MDC kaba la dep.
U la ong ba ka VPP ka la hiar laki laka mynta bad ha u snem 2028 ka lah ban hiar shaduh ka 80 percent ruh.
“Ha ka MP elekshon ka VPP ka ioh 5.70 lak vote hynrei tang khyndai bnai mynta ha ka MDC elekshon ka hiar sha ka 3.71 lak vote bad ha u 2028, ka lah ban hiar sha ka 80 percent ruh”, la kam u bah Sniawbhalang.

Halor ka jingkynnoh ba ka jingjop ka VPP tang 8 ngut ha Jaintia Hills na ka jingpyndonkam da ka bor, u bah Sniawbhalang ula ong ba ka jingjop ka NPP 13 ngut ha JHADC kam mut ba ka pyndonkam da ka bor bad ula buh jingkylli ba lada kynnoh ba ka NPP ka pyndonkam da ka bor, ka dei ka VPP kaba pyndonkam da ka bor ban leit shoh briew ha Narwan. U la ong ba hato ka VPP kaba ioh 17 ngut ha KHADC, ka pyndonkam da ka bor.
Ha kajuh ka por, u la ong ba ka jingsynshar kam don jingthut watla ka don ka jingiapher hapdeng ka party kaba synshar ha ka sorkar jylla bad ha ki district council.

Haba kren mynta ka sngi, u bah Sniawbhalang u la ong ba ka sorkar jylla kam ym don kano kano ka jingeh ban iatreilang bad ki district council namar ba baroh kiba synshar ka long na ka bynta u paidbah.
Kane ka jingkren u bah Sniawbhalang ka long hadien ba ka Voice of the People Party (VPP) kan synshar ha ka KHADC hadien ba ka la jop kput marwei haduh 17 ngut.

U bah Sniawbhalang ula ong ba mynshwa ruh ka don kum kane ka jingiapher ki seng sain pyrthei ba synshar ha ka jylla bad ha ki district council hynrei kam don kano kano ka jingthut.
Ha KHADC ka VPP kan synshar marwei khlem da donkam ia kiwei ban iasnohlang katba ha JHADC ka NPP kan ialam ia ka Executive Committee ryngkat ka UDP bad ki MDC shimet.