Shillong:U President ka Voice of People Party (VPP), u bah Ardent Miller Basaiawmoit ha ka jingialang paidbah kaba la long ha Nongstoiñ ula pynshai halor ka rai jong ka party ban pynduh tiket ia u bah Marbiang Nongsiej, da kaba kdew ba hashwa ba ka party kan pynduh tiket ia u kum u nongialam ula dep ban iakren bad iasyllok bha halor ka daw ba hap ban pynduh tiket noh ia u.
Haba kren ha kane ka jingialang, u bah Ardent ula ong ba kum ka party hi ka la dep ban kren shai ba lada ka ai tiket ia u A ne u B ruh baroh kiba apply tiket ki dei ban hun bad ki dei ban iatreilang bad kata ka dei ka soskular ba la ia soi bad ki nongtrei ka party baroh lada phi leit sha baroh ka Ri khasi Jaintia, kito ki ba ioh tiket bad ki bym ioh ki iatreilang.
“Ha kaba iadei bad ka jingshah pynduh tiket ia u bah Marbiang Nongsiej ula ong ba naduh ba sdang hi ka VPP ka don ka jingkhohnioh ban ai tiket ia u bah Marbiang Nongsiej namar ka don ka jingiakren sharum shaneng ba u bah Marbiang u don bynta ban khaii dewiong bad ki high level, ngi iohsngew ia kata hynrei une u samla ula pynpaw ia ka jingthrang ban iatreilang bad ka VPP kam dei tang ban ioh tiket bad khlem da niew ia ki jingtrei ba ula trei ha ki por ba la dep kumta ngi la rai ban ai tiket ia u”, ula ong.
Ula bynrap, “ngi la kwah ban ai lad ia u bah Marbiang Nongsiej wat la don ka jingkynnoh, hynrei kynsan la mih kawei ka video ha ki social media, ba u bah Marbiang Nongsiej lem bad u paralok jong u, ba ki la pynpaw ka jingkhublei ia u Conrad K Sangma namar kata ka jingioh laisen ban tih dewiong kane ka video ka dei naduh u snem 2021”.
U bah Ardent ula bteng shuh shuh, “kane ka la pynlong ia ngi ki nongialam ba kumno ngim tip halor kane, bad ka la pynlong ia ngi bad ngin hap ban pyrkhat biang namar kane ka long kata ka jingpynap shrip kaba kiba pyrshah ki la pynap lupa ban khyrwit ia u bah Ardent haba jem jai”.
Ula iathuh, “Nga la phone ia u bah Marbiang, ban iakren halor kane namar kane ka video kan buh jingeh ia ka party lada ka party ka bakla namar ha kane kajuh ka rynsan nga la dep kren shaphang ka jingkam ka sorkar ba ka la plie ia ka jingkhaii dewiong bad nga la buh jingkylli ba hato don tang 5 ngut 6 ngut kita ki nongkhaii dewiong ha ka jylla, u paidbah uba bun uba khaii dewiong ym ioh lad bad kin sa ong ba u bah Ardent ki kren kumno katba ka VPP ka ai tiket kumno ngin jubab pat ia u paidbah”.
“Kumta kum u hymmen nga la iakren bad u ban pynpaw ia ka jingsngewkhia bad tyrwa kumno ban pyrkhat ban buh ia ka party ha ka lynti ba shngain bad kam shym la don kano kano ka daw shimet bad u bah Marbiang hynrei ka video ba mih hi ngi sngew ba ka dei ka shrip pyrshah ia ka VPP bad ngin ym lah ban pyrkhat tang na ka bynta uwei u briew ne kawei ka constituency ka ban ktah lut pat ia baroh ki contstituency kumta ngi rai noh ban pynduh tiket noh ia u”, ula bynrap.
ka party ka la leh ia kaba dei. Nang iaid shapphrang. Long Live BPP.