Ka Veterinary kam don bynta ha ka khaii ki nongdie syiar

Shillong, 5 Jymmang:
Ka Animal Husbandry & Veterinary kam don bynta ha ka ioh ka duh jong ka khaii syiar namar kadei ka kam jong ki shimet.
Ka tnad ri jingri ka lah ban tuklar tang lada don kino kino ki jingpang.
Haba iakren ba ki heh katei ka tnad Veterinary la iathuh ba kim lah ba don bynta ne ban tuklar ha ka kam jong ki lait noh tang ki farm ka sorkar ba la buh dor da ki Department.
“Ngim lah ban tuklar ha ka kam khaii pateng syiar ki riew shimet lait tang lada don kino kino ki jingpang”, la ong uwei na ki heh jong ka tnad Veterinary.
Ki la ong ruh ba kim lah ban buh dor ia ki syiar jong ki nongkhaii kiba thied syiar bym dei na ka farm sorkar namar ia ka dor ka mur la peit da u DC ha ka District.
Lah ban kdew ba ka All Meghalaya Poultry Suppliers and Retailers Association (AMPSRA) ka la rai ba sahngeh die syiar naduh ka 1 tarik u Jymmang haduh 7 tarik. Katba ka Meghalaya Poultry Farmers Welfare Association (MPFWA) ka la pyrshah ia ka rai ka AMPSRA ban khang dukan die dohsyiar.
Kam mynshwa u DC u la maham ba kim bit ban phah khang dukan jubor ia no iano ruh bad u la bthah ia ki pulit ban peitngor ban nym shah ia ki dkhot katei ka seng ban khang jubor ia ki dukan bad lada don baleh kumta u la bthah ba ki dei ban leit ujor sha ki pulit.