Shillong:U Bah Metbah Lyngdoh, President jong ka United Democratic Party (UDP), u ba long ruh u lamphang jong dorbar jylla, u la ong ba ka seng, kan ym shong kli kti, lada ka lap ba ka sorkar Meghalaya Democratic Alliance (MDA) kam trei ha ka lynti kaba dei.
“Ngin ym shong kli kti, hynrei ngin trei shitom na ka bynta ka jingbha jong ki nongshong shnong ha ka jylla,haba ngi lap kano kano ka jingtrei ka bym hok na ka liang jong ka MDA” ong u bah Lyngdoh ha ka sngi saitjain.
Kane ka jingkren na u lamphang, ka long hadien ba mih ki jingpyrshah na kiba bun halor ka khubor ba ka sorkar ba la ialam da u Conrad K Sangma, ki mut ban aiti ia ka Meghalaya Energy Corporation Limited (MeECL) sha ki riewshimet.
“Namar ba ngi dei ka party ka ba iasynrop lang ngin sa iakren lang hapoh jong ka MDA bad kum u nongialam jong ka team, u dei u myntri rangbah kumta ngi donkam ban iakren ia kane ka mat bad u myntri rangbah haba kum kine ki mat ki mih na ka por sha ka por”u la ong.
U nongialam ka UDP u la ong ruh ba ka sorkar jylla ka dei ban da bishar bniah bha ha kaba iadei bad kano kano ka rai ka ba kin shim halor ka MeECL distribution franchisees (DFs) ia ki Rural Electrification Corporation Power Distribution Company (REC PDCL) namar ki dei ki mat ki ba donkam.
“Kane ka mat ka long ka ba donkam, ka sorkar ka dei ban bishar bniah biang. Nga la dep ban ia kynduh bad u myntri rangbah bad ngi la dep ban ia kren halor kane ka bynta.Nga la dep ban ia kynduh bad shibun ki group bad ki seng bapher, na ka por sha ka por halor kane ka phang.Kumta kano kano ka jingai jingmut ka dei ban pdiang, khnang ban lah ban wanrah jingshai ha ka ba iadei ban pynbha ia ka MeECL namar kane ka dei ka mat kaba la sah slem,” u la bynrap.
U bah Lyngdoh u la ai jingmut ba ka sorkar ka dei ban pyrkhat ruh ia ka jingmyntoi jong ka MeECL, bad ka jingmyntoi jong ki nongtrei bad kumjuh ruh ka jingmyntoi jong ki nongshong shnong bad ka jylla ha ba shim kano kano ka rai.
Phi don ban ong eiei?