“Ka UDP kam lah pynkhyllem ia u Bah Pynshngain”

Shillong, 19 ’lyngkot:
Ka sain pyrthei ha KHADC ka la khih bha napoh ban pynkhyllem ia u Bah Pynshngain N Syiem na ka shuki CEM da ka jingtrei sop sop ka UDP, kaba don lang ha kane ka Executive Committee hi hapoh ka lama ka People’s Democratic Forum ( PDF).
Haba twad jingmut na ki katto katne ngut ki MDC shimet, ki la pynpaw ba ka EC kan skhem beit hapoh ka jingialam u Bah Pynshngain bad ki kwah ba un neh haduh ban kut syndon kane ka aiom.
Haba kubur ba ka la don shisha ka jingpyrshang pynkhih na ka UDP ban pynkhyllem ia u Bah Pynshngain, u secretary ka United Democratic Alliance (UDA) ka kynhun synrop jong ki MDC shimet, u Bah Latiplang Kharkongor, u la ong, “Ka UDP ka la pyrshang ban pynkhyllem ia u Bah Pynshngain haduh mynta ruh tangba ngin nym ailad”.
U la ong ba ki MDCshimet baroh, ki la pynpaw ba ki kwah ba u Bah Pynshngain un neh kum u CEM haduh ban kut syndon kane ka samoi. Katkum ka jingong u Bah Kharkongor, ka UDP kan nym lah ban pynkhyllem ia u Bah Pynshngain namar ba don ruh ki MDC, nongialam jongka, ki pyrshah iaka jingthmu ka party ban pynkhyllem ia u CEM.
“Ngin sa peit ki ioh ne em ia ka jingbun paid ki MDC namar ba ma ngi ka UDA, ngin don beit bad u Bah Pynshngain”, la bynrap u Bah Kharkongor.
Ha kawei ka liang, u la iathuh ba u Lat ka jylla u lah ban ai ia ka jingmynjur ia u kum u EM lashai ne lashi sngi namar ba ka sorkar jylla ka la phah ia ka kyrteng jong u sha ka ophis u Lat ha kine ki sngi.
“Nga tharai u Lat u lah ban phah lashai ne lashi sngi ia ka kyrteng jong nga namar ba ka sorkar jylla ka la dep phah sha ka ophis u Lat ha kine ki sngi”, u la ong.