Ka UDP kam khang ban rah jing bym shaniah U Bah Shylla

Shillong, 22 Rymphang:
Hadien ba la shah kynthah ia ka jingleit rah u MDC ka party u Bah HS Shylla ia ka jing bym shaniah shuh, pyrshah ia ka Executive Committee ka People Democratic Forum (PDF) ba la ialam da u Bah Pynshngain N Syiem kum u CEM, uba dei na kajuh ka liang synshar, ha KHADC, ki nongialam ka party na seng kmie ki la ongg ba ka party kam shym la khang ia ki MDC ban leh da kano kano ka bynta ban pan jingshai halor ki khyndai tylli ki mat hapoh ka dorbar hadien ba kim hun ia ka jubab na u CEM.
Haba iakren bad u General Secretary ka UDP u Dr Jemino Mawthoh u la ong, “Ka UDP kam shym la khang ia ki MDC ka party ban wanrah da ka NC ne kano kano ka lynti na ka bynta ban wad jingshai halor ki kam bymman kane ka EC ba ialam da u Bah Pynshngain”.
U la ong biang, “Ngi la ieh ha ka jingstad jong ki MDC ban leh ia kaba donkam khamtam haba u Bah HS Shylla u dei uwei uba la kylla sohpdung ban shah takrain ha kiwei, u don hok ruh ban pynshai ban iada ia ka jingshah kynnoh”.
Kat kum ka jingong u Dr Mawthoh ha ka synshar paidbah u dkhot u don hok ban pynsngew ia ka nongrim khamtam hadien ba u la shah takrain bad shah kynthah bad hap ban pyni ia ki nongrim kaba ktah ia ka longiing jong u.
U general secretary ka UDP u la ong ba ka party ka la iakren ia kane shwa ban don ka dorbar ka KHADC bad ka la sngew dei ban ieh ha ka jingstad jong ki MDC ban leh ia kaba donkam na ka bynta ban pan jingshai ban thad ia ki kam bamsap kane ka EC jong u Bah Pynshngain halor ki khyndai tylli ki mat ba ka party ka la pan jingshai na u CEM hynrei uba la ai pynban da ka jubab tang dep kaba shi lain.
“Ka jingjubab u CEM kam long kaba hun bad nakata ka daw, ba ngi la iarai ha ka jingialang ban ailad ha ka jingstad ki MDC ban leh ia kane hapoh ka iing dorbar”, la ong u GS ka UDP.
U la ong ba ka jinglah u Bah Shylla ban wanrah ia ka NC wat la u la weng noh mynta ka sngi, hynrei u la jop namar ba u la lah ban thad madan ia ki kam bymman ka EC ba ialam da u Bah Pynshngain.
“Wat la u Bah Shylla u la weng noh ia ka NC hynrei u la jop ban thad madan ia ki kam bymman ka EC u Bah Pynshngain, u la ioh ban thad ia ka jingpyniaid kane ka EC”, la ong u Dr Mawthoh.