Shillong:Ka seng United Democratic Party (UDP) ka la pynshai ba kam dei ka dkhot jong ka shatri National Demo cratic Alliance (NDA) bad kam don bynta ha ka NDA hynrei ka la leit sha ka jing ialang ha ka jingshah khot.
Haba pynshai halor kane, u general secretary ka UDP u Dr. Jemino Mawthoh mynta ka sngi, u la ong, “Kum u General Secretary jong ka UDP, nga kwah ban pynpaw hangne ba ngim iadon bynta eiei ruh em bad ka NDA. Ngim dei ruh ka alliance jong ka NDA”.
U la ong ba ka jingshah khot jingialang ia ki seng trai ri ha ka NDA ha ki por ba la leit ka dei tang shisien ha ka shatri ka Northeast Democratic Alliance (NEDA).
“Ka jingshah khot jingialang jong ki seng riewlum ha ki por ba ka leit noh ka long tang shisien hapoh ka shatri jong ka Northeast Democratic Alliance (NEDA) ban iakren halor ki kam pynroi ha Northeast”, la ong u General Secretary ka UDP.
Ha kajuh ka por, u la ong ba kum u nongkitkam ka parti, u kwah ban pynshai ba ka nongrim jong ki seng riewlum ka iapher bad ka nongrim jong ka NDA. “Hynrei nga kwah ban pynshai hangne ba kam don kano kano ka synjuk ne alliance bad ka NDA. Ka nongrim (ideology) jong ki party riewlum ka iapher bad ka nongrim jong ka NDA”, la bynrap u Dr. Jemino.
Lah ban kdew ba ka BJP ka la thaw ia ka NDA da kaba synrop lang ia ki seng sain pyrthei kiba pyrshah ia ka kynhun kaba ialam ka Congress ka United Progressive Alliance (UPA) ha ki snem ba la leit bad ha thain shatei lammihngi ka la thaw ia ka North East Democratic Alliance (NEDA).
Ka ktien te em, katba ka dud ki iadih lang