Ka UDP kam dawa thymmai ia ka shuki Lamphang, ngi kwah ban shong da uwei pat bym don shuh u Dr Don: Bindo

Shillong: U Senior Working President ka UDP u bah Bindo M Lanong u la ong ba ka UDP kam shym la dawa thymmai ia ka kam Lamphang ka iing dorbar hynrei ka shu ong ba ka donkam ban pynshong da uwei pat u dkhot hadien ba la khlad kyndit noh u Dr Donkupar Roy, uba bat ia kane ka kam.

Haba kren mynta ka sngi, u bah Bindo u la ong, “Ngi khlem pan eiei ruh em kaba thymmai, hynrei shu ong beit kato ka shuki u Dr Donkupar, ngin sa ai pat ha uwei u briew bad tang kata hi. Ngim dawa eiei ruh em hynrei ngi shu ong ban pynneh ia ka shuki ba shong u Dr Don”.
Halor ka jingkam kiwei ki party ba ka shuki Lamphang kam dei kaba la rai ne iateh ban leit sha ka UDP, u bah Bindo u la ong biang, “Baroh ki ia kwah, bad ia ka jingkwah u briew mano ba lah ban khang, ym don ba lah ban khang”.
U la ong ba namar ba ia kane ka shuki, la bat da u Dr Donkupar na ka UDP, hynrei lada dei ba u Dr Donkupar u dang don, ka shuki ruh ka dang don bad u.
“Ngi shu ong tang kumne ba lada ym dei ba khlad noh Dr Donkupar khlem pat dei por, ka mut u dang don bad ka shuki ruh, ka dang don beit bad u, hynrei namar ba u khlad, hynrei ka shuki ka dang don”, la ong u bah Bindo.
Kane ka jingkren jong u bah Bindo ka long hadien ba ha kine ki sngi, ka NPP, ka United Progressive F ront (UPF) ka la theh um pjah ba ka shuki Lamphang kam dei kaba ia rai ban ai sha ka UDP, hynrei la shu burom ia u Dr Donkupar ha kato ka por namar ba u dei uba rangbah bad kum u kpa.
Ka la mih ka khubor ruh ba ka kynhun UPF kaba don ka PDF, NCP bad MLA shimet, ka kwah ba ka shuki Lamphang ka dei ban rai da ka Meghalaya Democratic Alliance (MDA).