Shillong, 06 Nohprah:
U President ka UDP u Dr Donkupar Roy u la ong ba ka UDP ka kwah ban pynshai paidbah ba kam shym la pynmih ia ka mat ilekshon, ha kane ka elekshon MDC shiteng samoi namar ba ka la dep pynmih naduh ka elekshon ba pura kata ha u snem 2014. Hynrei katkum ka jingong, u Dr Donkupar, ka mat ilekshon ka UDP ha kane ka kynti kan long ban kyrshan ia u Bah Pynshngain N Syiem kum u CEM ka KHADC.
Haba kren mynta ka sngi sha ki lad pathai khubor, u Dr Donkupar u la ong, “Nga kwah ban pynshai ia ki paidbah kiba kylli balei khlem pynmih manifesto, ka jubab ka long namar ba ka party ka la dep ban pynmih ia ka manifesto ha ka elekshon MDC ba la dep (2014) bad kane mynta ka dei tang ka elekshon shiteng samoi”.
U la ong ba ha kano kano ka elekshon haba ka seng, kam ioh ia ka jingbun paid ym lah ban pyntreikam bad ka mat ilekshon, kan sah noh kumto.
Katkum ka jingong u Dr Donkupar, kane ka elekshon MDC shiteng samoi ka wan dei tang namar ka jingkwah ka sorkar khamtam u Myntri Rangbah u Dr Mukul Sangma ban kput ia u CEM ka KHADC u Bah Pynshngain N Syiem.
“Baroh ngi tip ia ka jingiakhun hapdeng ka sorkar bad ka KHADC haduh ba ka sorkar ka la wanrah ia ka ain khang bat ar kam, ka‘Prevention of Disqualification (Members of the Legislative Assembly of Meghalaya) Amendment Bill, 2015″, la ong u Dr Donkupar.
U la ong biang, “Ka jingwanrah ka sorkar u Dr Mukul ia kane ka ain khang bat ar kam, ka long ban phah risain ia baroh ki MLA ba long MDC khamtam ia u Bah Pynshngain ban pynhiar shuki CEM lada un risain”.
Hynrei u Bah Pynshngain u la ialeh pyrshah bad u la shah pynksan ha ka election commission ka India, katba kiwei ki MDC ki la risain namar ka jingtieng kynthup ki MDC ka UDP ruh.
“Ka jingkylli ka mih, la ngin kyrshan ia u CEM ka KHADC ban pynkhlain ia ka district council ne iaka sorkar kaba thmu ban pyntroin ia ka district council. Ma ngi ha ka UDP, ngi ka kwah ban pynkhlain ia ka district council bad ngi rai ban kyrshan ia u Bah Pynshngain kum u CEM ka KHADC”, la ong u Dr Donkupar.
U la ong napdeng baroh ki seng, dei tang ka UDP bad ka KHNAM kaba kyrshan ia u Bah Pynshngain bad ngi kyrpad ia ki paidbah ban kyrshan ia ka UDP kaba kwah ban pynkhlain ia ka district council.
Ka jingkynnoh ban wanrah ia kane ka elekshon MDC shiteng samoi, ka dei ia ka sorkar jylla kaba la leh khlem da pyrkhat.
Ha kawei ka liang, u President ka UDP u la ong ba ka seng, kan ai beit ia ka jingkyrshan ia u Bah Pynshngain kum u CEM ka KHADC lada u trei kumba u trei mynta ha kaba baroh kim don ka jingiathum bad ka don ka jingiatreilang bad ka jingiasngewthuh jingmut lang baroh kiba don ha ka liangsynshar.
Um kwah ruh ban kren jrong halor ka jingpynlait paidbah u Bah Pynshngain ia ka Campaign for Change da kaba ong, “Kane ka campaign kam don ka jingthew lynti jongka shano ban iaid. Haba change ne jingkylla, ka mut ia kaei ka lynti iaid”, la ong u Dr Donkupar.
Halor ka ain khang bat arkam ka sorkar MUA-II, u Dr Donkupar ula ong ba kane ka ain, ka ‘Prevention of Disqualification (Members of the Legislative Assembly of Meghalaya) Amendment Bill, 2015 ka la iap mynta.
“Phi amend (pynkylla) ne phim amend, kane ka ain ka ‘Prevention of Disqualification (Members of the Legislative Assembly of Meghalaya) Amendment Bill, 2015, kam don jingmut shuh mynta bad ki MLA ki lah ban ialeh ia ka MDC ruh”, la ong u Dr Donkupar haba kren hynne ka sngi sha ki lad pathai khubor.
U la ong ba kane ka ain kan lah ban treikam tang lada kan don ka jingpynkylla ia ka Sixth Scheduled ka riti synshar ka ri, kaban leh da ka dorbar parliament ka ri.
U nongialam liangpyrshah u la ong ba ha ka por ba la pdiang jubor da ka liangsynshar ha iing dorbar ia ka ain khang bat arkam, ka‘Prevention of Disqualification (Members of the Legislative Assembly of Meghalaya) Amendment Bill, 2015’ mynshem snem, dei u myntri rangbah u Dr Mukul Sangma uba la pynbor ba ki MLA ki dei ban risain noh na ka kam MDC.
“Ka jingrisain jong ki MDC, dei ban leit ka jingkitkhlieh sha ka sorkar jylla kaba la phah ban risain halor kane”, u la ong.
Kane ka ain khang bat arkam jong ka sorkar MUA-II, kam shymla treikam satia haduh kine ki sngi khamtam haba u Bah Pynshngain N Syiem uba bat ar kam, kum u MDC bad u MLA, um shym la kohnguh satia ia ka hukum ka sorkar bad u la shah pynksan ruh ha ka ophis u Lat ka jylla bad ka High Court halor kane kam bad ruh na ka election commission ka India.
Hynrei kaba sngew lyngngoh ka long ba ka sorkar ka la kam ba kane ka ain ka dang trei kam bad ka don ka bor jongka, haba haduh shisnem tam la jan iaid ka por, kam shym la treikam satia.
Hynniew ngut ki MLA ba long MDC ki la iehnoh ia kane ka kam MDC kynthup Bah HDR Lyngdoh, Bah Ardent M Basiawmoit, Bah Metbah Lyngdoh, Bah KP Pangiang, Bah Sanbor Shullai bad Bah HB Nongsiej ka KHADC bad u Bah Stephanson Mukhim na JHADC hadien ba ka sorkar ka la pdiang ia ka ain khang bat ar kam ka ‘Prevention of Disqualification (Members of the Legislative Assembly of Meghalaya) Amendment Bill, 2015’.
Phi don ban ong eiei?