Ka UDP, ka dei u paia ba radbah jong ka Sorkar MDA; ka dei ban iakren halor ka jingjia hapoh Mawlai

Shillong: Ka sur ki nong Mawlai, myn hynnin ka sngi, ka la leit ban iakynduh ia u Lamphang ka ingdorbar Thawain ka jylla, u bah Metbah Lyngdoh u ba long ruh u President rangbah ka party UDP ban pan ka jing kyrshan na ka bynta ka jingdawa ban weng kam shipor ia ki heh pulit kaba kynthup ia U Superintendent of Police ka East Jaintia Hills, u Superintendent of Police Traffic Shillong bad u Director General of Police.

Kum shi bynta ban bud dien ia ka shithi kaba ki la dep ban ai naduh ka 31 tarik u Nailur ia ki 35 ngut ki MLA khasi ha kaba yn lah ban pynthikna ba kine ki MLA ki shim khia ia kane ka shithi, ym tang da ka ktien, hynrei da ka kam ban ia kren halor ka jingshah pyniap u bah Cheristerfield Thangkhiew.

Ka Sur ka NongMawlai ban pynskhem ia ka jingkyrshan ka ba pura ia ka ne ka jingdawa jong ki, mynta ka sngi ki la leit ban ia kynduh ia ki nongialam jong ki party bapher bapher ka ba kynthup ia ka Congress ki la leit ban pan ka jingkyrshan lyngba u bah PT Sawkmie bad ia u bah H.M Shangpliang, na ka bynta ka HSPDP, ki la leit lyngba ia u bah Renikton L Tongkhar, na ka PDF ki la leit lyngba u bah Hamletson Dohling bad ia ka party UDP lyngba u bah Metbah Lyngdoh.

Haba ia kren bad ki lad pathai khubor, na ka liang u bah Donboklang Kharlyngdoh, u la iathuh ba haduh mynta na ka liang ka Congress, u bah PT Sawkmie bad u bah HM Shangpliang ki la dep ban soi ia kane ka shithi , na ka liang ka PDF u bah Hamletson Dohling, u la kular ba kin ia kren shuwa ia baroh saw ngut ki MLA na party PDF ban soi lang ia kane ka jingdawa jong ki.
Ha kaba ia dei bad ka HSPDP, u bah Renikton L Thongkhar u la kren shai ba kan sa don ka jingiakynduh hapdeng ka RDA bad na ka liang u President ka UDP u bah Metbah, u la kular ban rah ia kane ka mat hapoh ka jingialang jong ka party UDP.

U bah Donboklang, u la ong ba ka jingphai khmat jong ki Sur ki Nong Mawlai, hi ka long ia ka party UDP, namar ba ka dei u paia jong ka Sorkar MDA ha ka jylla bad lada weng noh ka jingkyrshan na ka sorkar MDA kaei ka ban jia ia ka sorkar jylla.
“Lada don hi ka mon (political will) kan ym don jingeh namar ba ki jing dawa jongngi kim dei, ki bym long ban pdiang”.