Ka tulop nonghikai, heh bun shah ka tulop peon, ong u Dr Don

Shillong, 16 Lber:
U Nongialam liang pyrshah u Dr Donkupar Roy u la ong ba ka jingkhmih lynti ka sorkar ban ai ia ka pule puthi kaba paka ka dei ban iaid bad ka jingsiew jong ki nonghikai kaba biang.
“Kumno ngin khmih lynti ba ka jing hikai kan long kaba paka khamtam sha nongkyn dong haba ia ka tulop jong ki nonghikai skul dang kham heh bun shah ka tulop jong ki peon, ki chowkidar”, la ong u Dr Don haba shim bynta ha ka jingiatai nia halor ka jingkren mang tyngka jong u Myntri Rangbah ka jylla.
U Dr Don u la ong ba ka tnad pule puthi ka dei kawei kaba kongsan tam ha ka ri bad kiwei kiwei ki ri ki kiew sted namar ba ki phaikhmat kham kyrpang ia ka pule puthi.
“Ka jinghikai kaba paka ka dei ban long ruh ryngkat bad ka jingsiew kaba paka khnang ban ioh ia ka jingmih kaba paka”, la ong u Dr Don.
U la ong ba ki skul sha nongkyndong ki long lyngkrang bad ka long synei ia ki nonghikai ban trei ia ka kam namar ba ka tulop ka bym iahap.
Ha jylla Sikkim ka tulop jong ki nonghikai skul SSA ka long haduh T. 25 hajar shi bnai katba ma ngi hangne ha jylla, ka long tang T.6-7 hajar shi bnai”, la ong u Dr Don bad bynrap, ba ka sorkar ka siew tulop kaba heh ia ki peon, ki chowkidar, ka la dei ruh ban siew ka tulop kaba heh ia ki nonghikai.
Ha kawei ka liang, u Dr Don u la ong ba ka tnad ka rep ka riang ruh ka dei kawei kaba ka sorkar ka dei ban ai ia ka jingpynleit jingmut kaba kham kyrpang.
U la ong ba bunsien ki ophisar sorkar, ki kmen ban shong tang ha shuki ban leh ia ki file work ne shu soi kot hynrei, ki dei ban leit sha ki jaka nongkyndong ban peit ban iarap ia ki briew kumno ban pynkiew ia ka rep ka riang. “Nga la ju iohi bad ju lap ba bun ki ophisar ki shu shong beit ha shuki ha ophis da ki bnai, bad ki taiew, ban leh ia ki kam kot (file work) bad kim don mynsiem ban leit tur sha jaka nongkyndong”, la ong u Dr Donkupar.
U la ong ba ka sorkar ka la dei ban leh eiei ban thungkam noh ia ki samla kiba la leit pule na ka bhah sorkar ha ka rep ka riang namar bun kim pat ioh kam wat la bun kiba la jan palat rta noh kiba la ap slem na ka sorkar.