Ka tnat pulit ka dei ban phah sha iingbishar KHADC, haba tyngkhuh Khasi para Khasi

Nongpoh: Haba kren ha ka sngi ba la plie paidbah ia ka Iingbishar jong ka District Council kaba don ha Nongpoh, u Bah Titosstarwell Chyne, CEM ka KHADC, u la pynpaw ia ka jingsngewkmen kaba khraw eh ba la ioh ban plie paidbah ia katei ka Iingbishar bad uba la ong ruh ba kan long kaba ai jingmyntoi ei na bynta ki paidbah ha Ri Bhoi hi baroh kawei.

Lyngba ki jingkren jong u CEM, u la pynpaw ruh, ba kum u CEM, u kwah ruh ba ki tnat sorkar bad khamtam eh ia ka tnat Pulit ba ki dei ban sngewthuh halor ka Iingbishar ka KHADC bad kata ka long ba lada don kino kino ki jingshah tian bishar ia ki kam hapdeng Khasi para Khasi, la dei ban rah shwa sha ka Iingbishar jong ka KHADC.

Ha kawei ruh ka liang, utei u khliehduh hapoh ka KHADC, u la ong ba ka jinglah ban plie ia katei ka Iingbishar jong ka KHADC, ym tang ba ka lah ban ai ia kata ka jingbishar ia ki paidbah, hynrei kan long ruh kum kawei na ki lad ban aikam aijam ia kito ki khun samla bad khamtam eh ia kito kiba la lah ban pyndep ia ki jingpule Ain ha ki kyndan bapher bapher.