Ka tnat kem kyiad kaba iap:AJYWO

Jowai, 17 Jylliew:
Ka sengkmie AJYWO ka la ong ba ka tnad excise department hapoh jong ka East Jaintia Hills District ka dei ka tnad ka ba iap bad ka bym trei kam satia namar ba kam lah ban tehlakam ia ka jingjyllei ki dukan kiad beain bad ka jingdie kiad pathar ha EJHD kaba la wanrah ia ki kam sniew ba har rukom ka ba la ktah shi katdei eh ia ka burom i jot bad ka shongsuk shongsain ka EJHD.
U Bah MH Dkhar President ka AJYWO u la ong ba ka jingjyllei jong ki dukan die kiad beain ha shilynter jong u surok NH 44 naduh ki thain Tuber shoh shrieh haduh mynkre bad ter ter sharum ka pyni ba ka tnad trei kam jong ka Excise ha EJHD kam ler bad ka la iap.
U Bah M H Dkhar u la kynthah jur ia ka tnad Excise ha EJHD da ka ba ong ba ka jingbymler jong katei ka tnad ban teh lakam ia ka jingjyllei ki dukan die kiad beain ha shilynter jong u NH44 ba don ha East Jaintia Hills bad sha kiwei kiwei de ki kyndong kynshrot jong ka district ka pynlong ia ki jingsniew ba har rukom naduh ki kam leh be-ijot, ki kam pyniap briew ki kam tuh kam thiem bad ki kam rahbor ban jyllei ha katei ka district. Bun sien ki ba kum kitei ki kam sniew ki la jia hadien ka jingiadih kiad buaid ha ki ba kum kitei ki dukan die kiad. Kane ka jingbymler jong ka tei ka tnad ka la pynktha khlieh ia ki pulit ka EJHD ban tem ia ka jingjyllei ki kam bymman ha katei ka district.
Ka seng AJYWO ka la byrngem ba na ka bynta ban pynneh pynsah ia ka shongsuk shongsain kan sa tem ia ki dukan kiad beain ki ba don ha EJHD da kaba khyndang da ka RTI halor ka jingtrei kam jong ka tnad excise ha EJHD bad halor ka jingjyllei ki dukan kiad beain ha EJHD bad ka la maham ruh ban ujor pyrshah, lada donkam pyrshah ia ki dukan kiad beain.
“Ngi pynrem jur ym tang ia ki runar ki ba la pyniap ia ki shi kmie shi khun ha ka 11 tarik mynta u bnai ha ka shnong Mynkre hynrei ngi pynrem jur ruh ia ka tnad excise halor ka jingailad jong ka ban jyllei ki dukan kiad beain ha EJHD. Ngi kyntu ia ki bor jong ka ain ban pynshitom da ka ka ba tyngeh ia ki runar ba la pyniap ia kitei shi kmie shi khun bad ngi dawa ruh na u DC ka EJHD ban pynduh pyndam lut ia baroh ki dukan kiad beain ha EJHD” kren pynkut u bah M H Dkhar.