Ka tnad ka koit ka khiah ruh ‘ka pang’, ong u MLA ka Mylliem

Shillong, 09 Lber:
U MLA ka Mylliem uba dei u Government Chief Whip, u Bah Ronie V Lyngdoh u la ther ia ka tnad ka Koit ka Khiah kaba dei ban ai jingkoit jingkhiah sha ki paidbah hynrei dalade ruh ka long ka tnad kaba pang.
“Ka tnad ka Koit ka Khiah kaba dei ban ai jingkoit jingkhiah ia ki paidbah ruh ka pang ialade”, la ong u Bah Ronie haba kren ha ka jingai khublei ia ka jing kren maitphang u Lat ka jylla halor ki kam ka sorkar, ha ka dorbar mang tyngka mynta ka sngi.
U la ong ba ki tiar ki tar kiba la thied ha ka dor T. 5 klur ba la buh ha Shillong Civil hospital, kim shym la treikam bad ki shu shong ei. “Ia kine ki tiar la plie hi da u Myntri Rangbah ka jylla u Dr Mukul Sangma katto katne snem mynshwa”, la ong u Bah Ronie.
Kine ki tiar ki kynthup kum ka Endoscopy machine, CT Scan, Diagnostic, EMRI, kiba shu shong kai khlem pyntreikam ia ki, kiba la pynlut da ki klur tyngka ban ai ia ka jingshakri sha ki paidbah nongpang bad kiba duk ba jynjar ha ka jylla.
Kawei ka mat kaba u MLA ka Mylliem u la kren ka dei ia ka jingpyut ei ki dawai kaba la kot shaduh ka T. 4 klur na ka skhim NRHM. Kane ka dei kaei kaei kaba ka sorkar jylla ka dei ban pyrkhat bha ia kane. “Ngi dei ban pynlong ia ka tnad ka koit ka khiah kaba ryngkat kyrdan ha ka ri ha ka jingai jingsumar”, la ong u Bah Ronie.
Ha kawei ka liang, u Bah Ronie u la kyntu ia ka sorkar ba ka la dei ban aiti biang ban pyniaid ia ki bos saw khmut (JNNURM) ha ka Meghalaya Transport Corporation (MTC) ba kan lah ban khie im biang na ka jingring swai jongka.
“Naduh ba ka sorkar ka la aiti ban pyniaid ki Self Help Group (SHG), ka jingmih jinglut, ym ju don jingkhein shuh na ka jingkamai jong ki bos”, la ong u Bah Ronie bad ka la dei ia ka sorkar ban aiti ban pyniaid biang ka MTC kaba dei ka tnad ka sorkar jylla khnang ban long kum ka jingpynkhlain ia kane ka tnad kaba tlot bha.
U la ong ka MTC ha kaba nyngkong ka la pyniaid ia kine ki bos saw hynrei tang hadien lai snem ba la kut ka jingiateh, ka sorkar kam shym la ai shuh bad ka la aiti noh sha ki SHG. Katkum ka jingong u Bah Ronie ka jingaiti biang ha ka MTC ka long shi bynta ban wanrah biang ia ka jingkhein jingdiah kaba shai jong ka sorkar nalor ban pynkhie im ia ka MTC.