Ka thong ba hakhmat eh dei ban pynïoh ïa ka Civil Sub Division, ong U bah Hima Shangpliang

Shillong:U kyrtong ka Bharatiya Janata Party (BJP) na Mawsynram konstitwensi Bah HM Shangpliang hynne ka sngi ula ïathuh ba ka mat ba hakhmat eh ha kane ka ilekshon ka dei na ka bynta ban pynïoh Civil Sub Division ïa ka Mawsynram bad ban shna pynheh ïa ka surok na Mawngap sha Balat.

Haba kren hadien ka jingthep kyrteng u Bah Shangpliang ula ïathuh ruh ba ha ki snem ba la dep ula ïakren bad u Myntri Rangbah ka jylla ban pynbna noh da ka Sub Civil Division ha Mawsynram na ka bynta ban wanrah shuh shuh ïa ki kam pynroi hapoh ka thaiñ hynrei na ka liang ka sorkar kam shym la leh eiei na ka bynta ka jingmyntoi ki paidbah ka Mawsynram.
“Ha ki snem ba la dep, nga la ïakren bad u Myntri Rangbah halor ka jingdonkam ban pynkha noh ïa ka Civil Sub Division ïa ka Mawsynram na ka bynta ban wanrah ka synshar khaddar khamjan bad u paidbah hynrei haduh mynta u Myntri Rangbah um shim khia halor kane,” ong u Bah Shangpliang.

U Bah Shangpliang ula ong ba lada ka BJP ka ïoh ban thaw sorkar hadien kane ka ilekshon, un shim ka jingkitkhlieh ban pynthikna ba ka Mawsynram kan ïoh noh da ka Civil Sub Division.
U Bah Shangpliang ula ong ruh ba kala donkam ban palat ban pynheh ïa ka surok na Mawngap shaduh Balat namar kane ka surok ka long ka budlum ïa ki paidbah khamtam ïa ki nongrep ban shalan ïa ki mar mata sha ki ïew ki hat.
Ula ong ruh ba kane ka surok kan kyntiew ïa ka ïoh ka kot ki paidbah namar kan kyntiew ïa ka kam jngohkai pyrthei da ka ba wanrah ki lad lynti ban pynïoh kam ïoh jam ïa ki samla lyngba ki kam jngohkai pyrthei namar ka Mawsynram ruh ka don bun ki jaka ba itynnad kum ka thaiñ Sohra.

Shuh shuh ula bynrap ba ka jingkynthih na kawei ka parti sha kawei pat kan nym ktah ïa u ha kane ka ilekshon namar ki paidbah bad ki nongkyrshan hi kiba ïalam lynti ïa u ban ïasoh sha ka BJP.
“Ki paidbah kila pynpaw ha nga, ba lada donkam ban phet seng, dei ban phet sha ka BJP namar dei tang ka BJP kaba lah ban wanrah ïa ki kam pynroi kiba myntoi ïa baroh lang,” la ong u Bah Shangpliang.
Haba ther ïa ka jingkynnoh ba ka BJP kadei ka parti ba ibeiñ rit paid bad riew ngeit Kristan, u bah Shangpliang ula ong ba kine baroh kidei tang ki jingkynnoh khlem nongrim kiba la kynnoh da kiwei ki parti tang na ka bynta ban ïoh jingkyrshan na ki paidbah lyngba ka jingïalam bakla pyrshah ïa ka BJP.