Ka Them metor, ka long kumba ap, ia ka phlim thymmai, ong U MLA

Shillong: U MLA ka Rambrai Jyrngam, u Bah Kimfa S Marbaniang u la wanrah ia ki mat bapher bapher ban iatai ha ka sngi ba hynriew jong ka Dorbar Synrai ka ïing dorbar thawaiñ ka jylla bad une u MLA ka Congress u la wanrah ia ka mat kaba iadei bad ka them motor ha kaba u la ong ba ym don jingtip satia haduh kine ki sngi ba mynta ruh ba shano kane ka mat ka la poi bad jah.

U Bah Kimfa S Marbaniang u ong ba ka Sorkar Jylla ka la thaw ia ka High Level Committe naduh u bnai Jylliew 2018 hynrei haduh mynta ruh ia kata ka kaiphod ha kaba iadei bad ka them motor ym pat ioh satia bad u la ong ruh ba katba don dorbar ki nongmihkhmat ka liang pyrshah ki ju iai kylli na ka Sorkar kaba bat ia ka bor ba ka la leh kumno ia kane mat ha kaba iadei bad ka them metor bad ka jubab kaba mih ka long beit ba ba la jan shi la jan, hynrei kata ka jingong ka long pynban thik kumba ap ia ka phlim thymmai kaba itynnad bha ba kan sa mih hynrei ki dang shu pynmih shwa da ka jingpynitynnad bad ka jingpynbang(Trailer) bad haba kut jong kata ka pynbang mih pynban sa da ka jingthoh kaba ong ba kan sa pyni shen (Coming Soon) bad kane ka jingleh jong ka Sokar ka la pynbitar bad pyndom pynban ia ki paidbah kiba la iai ap ia ka kaiphod ka ban mih halor kane. Shuh shuh u la ong ruh ba ka iing dorbar ka la dep ban shim da ka rai ban pynrung noh ia ka ktien Khasi bad Garo ha ka khyrnit kaba phra jong ka riti synshar ka Ri India hynrei halor kane ruh u la ong ba ym don jingtip eiei satia ka long kumno.

U Bah Kimfa S Marbaniang u la kren ruh ha kaba iadei bad ki karkhana Coke kiba don ha Shahlang West Khasi Hills District ba watla ka tnad State Pollution Board ka la pynmih ia ka jingpynbna ba kine ki karkhana ki dei ban khang noh hynrei ym tip pat balei haduh mynta kine ki karkhana ki dang iai treikam sah. U Bah Kimfa S Marbaniang u la pynkynmaw ruh ia kawei na ki jingdawa ba ki paidbah ka Mawlai bad ki paidbah ka bri u Hynniewtrep baroh kawei ki dawa haduh mynta bad kata kadei ba ka Sorkar jylla ka dei ban sospon mardor ia ki heh pulit kiba la donkti ban leit bthat jubor ia ka jingim jong u Bah Cherisiterfield Thangkhiew ha ka 13 tarik u bnai Nailur 2021 hynrei ka Sorkar Jylla haduh mynta kam sngap bad ka leh bym patiaw pynban bad u la kyntu ba ka Sorkar ba ka dei ban sngap ia ka jingdawa jong ki paidbah ba bun balang hynrei ki paidbah kin nym don shuh kata ka jingshaniah ia kane ka Sorkar MDA.