KA THAIN DAWKI

“Dawki” ka Kadei ka kyrteng,kawei na ki shnong kaba rit,jongka Thain Warjaintia hapoh jongka West Jaintia Hills District,Amlarem subdivision. ka don marsyndah (khappud)bad ka Ri Bangladesh.Ka Dawki watla ka dei tang ka Shnong kaba rit, haba ia nujor Bad kiwei pat ki shnong ba marjan, hynrei jan baroh ki Nongshong shnong ka Ri Khasi Jaintia ki tip iaka naduh mynshwa bad khamtam lei mynta mynne bunbah kiba tip shaphang jongka wat ki bym dei naka Jaidbynriew Khasi Jaintia.
Haka jingtyllun jongka por, ka kyrteng Dawki, kamlong shuh tang ka kyrteng jongkawei ka shnong, Hynrei kala kdup noh iaka Kyrteng jongka Thain. Kumta Ngi ju iohsngew ki ba bun ki kren lyngkot “Nga dei sha Thain Dawki”.
Kane kam long kaba phylla namar, ngi ki Khasi ngi ju mlien ban pynbud kumta.Ka Thain Dawki, lah ban ong ba ka kdup iabun tylli ki shnong, naduh East khasi Hills, haduh Jaintia Hills.
Bad ki shnong kiba kynthup ha ka thain Dawki, ki lah ban Long Naduh Mawshun,Pomshutia,Wahkdait,Umkrem,Mawriang,Umsyiem bad kiwei kiwei ki shnong rit,kine ki dei na East Khasi Hills District.Bad naduh Nongtalang,Sohkha,Lamin,Shnongpdeng,Darrang,Bakur bad kiwei kiwei ki shnong rit, kine ki dei na West Jaintia Hills.
Ka Jingpawnam jongka Kyrteng Dawki, lah ban ong namar kadei kawei na ki Shnong kaba don ka jingiadei Bad ka Ri Bangladesh.Naduh mynshwa ki kmie ki kpa tymmen jongngi, ki ju iathuh khana iakata ka thma Bangladesh hapdeng ki ” ‘khar pathan” mynba ka Bangladesh ka dang dei ka East Pakistan.Kita ki jingiathuh khana ki ong, kumno ba ka Ri India Ka iarap iaki Nongbangladesh ban lait naka jingsynshar ki “pathan” (Pakistan) mynba ka Indira Gandhi ka dei ka Prime Minister jongka ri India.
Haka jingialeh kumno ban pynlaitluit iaka Ri Bangladesh, ka sorkar India ka la pyndonkam iaka Shnong Dawki bad ki shnong ba marjan jongka,kum ka lynti Bad ka len shipai kaba rieh!Bad nakine ki shnong la ju pyntur iaki Shipai india shapoh Bangladesh.Hadien ka Jinglaitluid jongka Ri Bangladesh,Ka Dawki ka dang iai long bad ka ieng kum kawei na ki Kyrteng Shnong ne thain kaba paw haki thain border,namar dei tang ka Dawki (Tamabil) kaba dei ka “Integrated Check  Post” hapoh Meghalya hapdeng ka Ri Bangladesh bad Ka Ri India,kaba lah ban iakhaii iakino kino ki mar, bad kumjuh ka dei ka lynti rung lynti mih ki briew ne ki nongshangkai pyrthei, kiba iaid iaka India bad ka Bangladesh.
Mynta ngi shem ba ka Dawki, lyngba ka jingiarap jongki wei ki shnong ba marjan kum ka Mawlynnong, Shnongpdeng, Darrang, Bad ka Krangshuri,kiba long ki jaka Shangkai ba pawnam,ka la nangkhamkiew bad pawnam khamtam ban khring iaki nongshangkai pyrthei na kylleng ban wan jngoh kyrpang ia ka wah umngot kaba khuid (Crystal clear water) bad khlem da klet ruh hadien ba ka Sorkar ka la pyniaid iaki “passengers” bus Dhaka-Shillong lyngba ka Dawki.
Shuh shuh, haba iatai iathir iaka lawei jongka Dawki,Ngi Shem ba Lehse ka Thain Dawki kan sa long kawei na ki Thain ba khamkyrpang jong ka Border area lada ki surok ki long kiba bha. Kumba ngi tip, Ka Sorkar ka la pynkhreh shait shait ban ioh tih naka bynta ban pynheh surok naduh Sor Shillong haduh border Dawki. Bad ka Jingkieng Dawki ka la don lypa haka “Plan” ne ka jingpynkhreh ban shna thymmai iaka.
Haka jingiathuh uwei u paralok,  u ong kumne “Ka jingkieng Dawki ynda la dep shna iaka, kan sa long ka kawei na ki jingkieng ba itynnad bad pawnam, namar nga la iohi iaka Drawing jongka”.
Kata ka lah ban long ka jingshisha, Namar shisien la ioh ban iakynduh ia u wei u Engineer napoh ri Japan, mynba ki dang leh survey kumno ban thaw ia ka surok Shillong -Dawki kumjuh bad ka Jingkieng Dawki.Haka jingsngewthuh jongnga kum u riewpaidbah, ka don ka jingshaniah bad ka jingsngew ba ki Engineer Japan lehse kin dei kiba tbit ban thaw ban shna.
Hynrei tang kawei kaba la shu ong ia uta u Engineer ka long, “Sngewbha leh iakaei kaei ka bym pynsniewdur palat ia ka Thain, khamtam kine ki jaka jongngi shane, mynta ngi ap jingkyrmen na kine ki nongwanshangkai pyrthei (Tourist).Uta u Engineer Japan u shu rkhie bad u shu kohnguh ka khlieh.
Hynrei kaei kaba sngewsih ka long, mynta ngi shem ba Kane ka project surok Bad jingkieng ka imat kumba ka iakynduh jingeh, khamtam ka don ka jingbna wer wer, ba ki trai shnong haka thain Dawki, ki don daw ban ym mynjur ba ka project kan iaid lyngba.
Ym lah ban tip haduh katno ka long kaba shong nongrim, Hynrei lada kane ka project bala kham slem kam ioh ban sdang noh, Kum ki nongshong shnong, ngi dei ban pyrkhat arsien.
Ngi dei ban shim ki lad ki lynti ym kumno ban sngewpyrshah tang naka bynta ki daw ba ngi mut da kumwei, Hynrei ngin shim ki lad ban wad lang iaka jingeh bad ia pynbeit lang daka ba shong nongrim hapdeng ka sorkar bad Ki trai jaka.Namar ngi dei ban sngewthuh shai, kiba kum kine ki project, nalor ba ka thain ka la pawnam lypa,kan long ka jingkyrkhu shuh shuh iaki nongshong shnong khamtam iakito ki bym pat sdang ban thaw lad thawlynti kumno ban pyllait na ka jingeh jongka jingduk jingkyrduh.
Haka kyntang iawai,ka Thain Dawki kadei kawei naki Thain kiba shngain watla ka don ha khappud Bangladesh,
Kane ka wan nyngkong na ka jinglong bad ka rukom im ki briew jongka thain, lada ia nujor sha kiwei ki thain border.
Watla ym lah lait hangne hangtai kiba pynsyier mynsiem iano iano, hynrei kita ki long tang kum ki jingjia ryngkhat. Hynrei ka tynrai hi ka long ba ki nongshong shnong ki dei kiba don ka mynsiem iatiplem kaba khraw shibun.Bad kiba dangbat iaka tipbriew tipblei kaba dei ka tynrai longbriew manbriew haka Jaidbynriew Khasi.

N:B:- U nongthoh u pdiang iaka jingkynthoh ne kyntu halor kane ka jingthoh bala pynmih.

Khublei Shibun

Shri.Dap B. Syngkrem
Nongthoh
[email protected]
Phone: 8787892028