“Ka TB hospital ka biang ha Umsawli”

Shillong, 11 Naiwieng:
U Myntri ka koit ka khiah ka jylla u Bah AL Hek u la ong ba ka jingpynkynriah ia ka TB hospital sha Umsawli na Jhalupara, ka long kaba biang bha namar ba katei ka jaka iahap.
U Bah Hek u la ong ba ki paidbah kim dei ban don ka mynsiem jingtieng ia ka jingleit buh ia ka TB hospital sha Umsawli namar ba kum kane ka hospital ki don ha kylleng ki bynta jong ka ri.
U Bah Hek u la ong ba ha ka jaka ka TB hospital kaba don mynta ha Jhalupara, yn tei noh ia ka Shillong Medical College.
U la ong ba ka jaka ha kaba yn buh ia ka TB Hospital ha Umsawli kan long kaba iahap bha bad ka sorkar ka dang pynkhreh shaid shaid ia kane.
“Mynta ngi donkam ia ka bording, ngi donkam ia ka um, ngi donkam baroh 24 kynta ia ka um ha hospital lym kumta, kam lah ban treikam”, la ong u Bah Hek. U la ong ba ka sorkar kan nym pynkynriah ia ka TB hospital na kaba don mynta haduh ba ka jaka thymmai ha Umsawli ka la biang nadong shadong.
U Bah Hek u la kyrmen ba ka sorkar kan lah ban tei ia katei ka hospipal hapoh 36 bnai.
Kham mynshwa, ka Dorbar Shnong na Mawpat-Umsawli ka la dep pyrshah ia ka jingthmu ka sorkar ban buh ia katei ka TB Hospital ha Umsawli.
Ka sorkar jylla ka la iasoh bad ka KPC Group na Kolkata ban shna ia ka Shillong Medical College lyngba ka Public-Private-Partnership (PPP).
Ia kane ka Medical College yn ngiam ban sumar nongpang 500 jingthiah ha ka jingheh jong ka jaka 23.8 akar ha Jhalupara bad kan ai jingsumar kumba 200,000 ngut ki nongpang man u snem.