U myntri sorkar ba peit ia ka tnad jngohkai ka jylla u bah Paul Lyngdoh ula ong ba ka jingwan rwai u Ed Sheeran ka la kyntiew bak-ly-bak ia ka karkhana ka siaw ka rwai ha ka jylla.
U Ed Sheeran uba dei u nongrwai ba pawnam ka pyrthei ula wan pynlynuh ha ka 12 tarik mynta u bnai ha madan JN Stadium, Polo Shillong. Ia kane ka tamasa la pyllong da ka kynhun shimet.
U bah Paul ula ong ba ka jingpoi ki paidbah da ki phew hajar ban leit sngap ia kane ka jingrwai u Ed Sheeran ka pyni ba ki paidbah kane ka Shillong ki don shisha ka snap kyrpang ne ka DNA jong ka jingieid ha ka put ka tem, ka rwai ka siaw.
Ha kajuh ka por, u la ong ba ka sorkar ka la pyrshang tyngeh ban pynbha ia ka kam jngohkai ha ka jylla da kaba pynshlur ia ki briew ban tei ia ki jaka sah kum ki homestay, ka jingpynbha ia ki surok khnang ban khring ia ki paidbah.
U la ong ba ia ka tamasa rwai kaba nyngkong la sdang ha u snem 2004 bad katba ki sngi kane ka la khring ia ki paidbah kylleng bad ka la kyntiew ia ka ioh ka kot bad kumjuh ia ka sap ka phong jong ki samla ha kane ka jylla.
Ym tang ban kyntiew ia ki kam rwai hynrei ka jingwan ki nongrwai ba pawnam nabar, ka la pynpaw shuh ia ki jaka jngohkai ha ka jylla ha kaba kine ki nongrwai ki leit ban jngohkai kum sha Sohra bad kiwei ki jaka. U la ong ba ka jingkylla kaba heh kan urlong ha kine ki ar snem ban wan ha kaba ka sorkar ka la sdang ban tei ia ka ropeway bad kiwei ki projek ban kyntiew ia ka kam jngohkai ha ka jylla.
Phi don ban ong eiei?