Ka Tamasa Ilekshon ka la wan biang, katba ka Jylla pat ka la pyut. To ngin iaweng noh ia ki sohpyut baroh

Da u Bah Philip Marwein

Shah ia nga ban sdang da kumne, “ha ka imlang sahlang kaba leh donbor bad ba jyllei da ka jingbamsap, ka jingsngap jar ka dei ha lade ka jingleh donbor : ha ka imlang sahlang ka ba kynrei ka jingleh bym hok, ka jingsngap jar hi ka dei ka jingleh bym hok: Kumta lada phi dei u ba shu sngap jar, bym don bynta ei ei ha ka politiks, phi dei hi u pilitishian, namar lada phi shu sngap jar bad sngap mynthi, phi iashah ia u nongban bein bad u riew shim kabu. Ban long ne ban ym long u pilitishian kam dei ka mat iatai. Ka Jingkylli bakongsan hangne ka long: “maphi phi don sha kano ka liang? “

Ka Ilekshon ka dei ka jingshim bynta da ka jingkmen bad ka jingrakhe ia ka jingjied ia ki nongmihkhmat (MLA) jong ki paidbah da ki paidbah, ban thaw ia ka sorkar kaba synshar ia ki paidbah (Festival of Democracy). Don kiba khot ia ka, ka Tamasa Ilekshon. Bun ki paidbah ki kmen ba la wan biang ka ilekshon na ka bynta ar tylli ki daw, kawei ka dei ba ki ioh peisa ei khlem pan bad kawei pat ka dei ka kabu ban jied noh da u ba larkam.

Ka jingthep-vote ban jied ia ki 60 ngut ki dkhot (MLA) jong ka Iingdorbar thaw Aiñ kaba 12 jong ka Meghalaya ka la jan wan biang. Kane kan long malu mala ha ka taiew bakut jong u bnai Rymphang, 2023. Ia ka sorkar thymmai dei ban thaw hashuwa ka 6 tarik u bnai Lber, 2023. Dei na kane ka daw ba ka jingpynkhreh na ka bynta kane ka kam bah, kaba dei ka kam im kam iap jong ki paidbah ka Jylla na ka bynta ki 5 snem ban wan. Kane ka long kaba kongsan bha na ka bynta ka Nongpyniaid ia ka ilekshon (Election Commission) lyngba u Bah Fredrick Roy Kharkongor, Chief Electoral Officer, ryngkat ka jingiatreilang jong ki Returning Officer jong baroh ki District. Ka jingpynkhreh na ka bynta kane ka kham khia ia ki Party bapher bapher ban ioh ia ki Kandidet kiba kynsai bad batbit tam ban jop ha ka jingiakhun. Kaba pynkhuslai jingmut tam bad ka lyngkor kaba khia ka long na ka bynta ki Kandidet kiba mih madan ban tyrwa ialade hakhmat ki paidbah ban ioh long MLA. Hynrei kaba kham kongsan tam ka long ia ki Nongjied Nongthep-vote ba kin da pynlut por ban da khan bha, da peit-thuh bad bishar bniah ia kum kino ki briew, kynthei lane shynrang, ki ban long kiba bitdor ban ioh long kiba la shah jied sha ka Iingdorbar thaw Aiñ jong ka Jylla, ym ban shu leit pynsyrwa kai ia ka por bakordor bad ka iktiar bakhraw ba la pynkhamti da ki 21,11,000 ngut ki Nongthep-vote ka Jylla.

Baroh ki Nongthep-vote kiba don ha ki Electoral Roll ki dei kiba la biang rta, tipbriew bha, kiba la nang pyrkhat hi, kiba laitluid, kiba la shemphang bha ia ka jingkordor jong ka longrynieng lajong, ia ka jingkordor jong ka shi bod (vote) jong ki ban ioh ia sorkar ka ban synshar 5 snem lynter ha ka jylla. Lada la thied ia ka vote jong ngi ngin ioh ia ka sorkar bajaboh bamsap baroh San snem, kumta wat khmih lynti ei ei shuh na ki MLA ba phi la jied. Lada kyrtiang dien ia ka mynnor ngi la ioh ia ki MLA kiba la paw ha ka jingtbit bad kiba kynsai. Ka mynta ka don ha kti jong ngi bad ka shong ha ngi ban leh kumno rai kumno ban ioh ia ki MLA kiba bitdor katkum ka por bad ka juk, ym ki riewkai ki bymlarkam bad kiba pynlong business kamai ia ka kam MLA kaba kyntang ban shakri ia ki paidbah bad ban thaw Aiñ na ka bynta ka jingbit jingbiang jong ka Jylla. Ka lashai lashisngi kan long kumno lada ngim kheinkor ia kane ka ilekshon kaba mynta.

Kaba shu iajied lymmuh lymmain ha ka hui hui hui hai hai ba shongshit ka peisa tyngka bad ka bam ka dih ba shu ioh ei ka don jingmut aiu? Hato kine ki Kandidet ne ki Agent jong ki ioh nangno ban pynsngewbha katne? Kam dei na ka pla lajong, ka dei na ka peisa ba la klop ne tuh na ka hok jong ki paidbah jong ka Jylla hi. Peit bad bishar bha, kaei kaba la jia ia ka Jylla? Hato kiba duk ki la nang duk bad kiba riewspah ki la nang bthei ka kpoh! Uei uba salia, niewkor sngewlem bad iarap lem ia ki baduk, ki rit ki ria, ki thap ki dab (marginalised)? Shano kita ki MLA, ki Minister, ki MP, MDC ia kiba ki paidbah ki la jied? Hato ki dei tang jong ki leader ba ki la thung, kiba iadei kam bad ki (ne) kiba iajuh iajem bad ki lane bad kiba ieid bathoin jong ki?

Ha ka jingsngewthuh jong nga hi ki MLA kiba dei ki Nongthaw Aiñ-ki Nongsynshar ki dei ban paw bha ia kine ki sap ki phong ha ki: ka jingtipbriew tipblei, tiphok tipsot (jingtieng burom ia U Blei), bym don dak siew bad jingshah pynbud nam: ka jingshemphang bapura bad ka kyrdan pule kaba biang: ki dak ki shin bapaw ha ki kam shakri bad iarap salonsar khlem lehshiliang ne nohshiliang khmat: ki bym buaid kiad, buaid niam, buaid party, buaid bor, buaid spah: u/ka briew ba lah ban shaniah bad bym kylla jutang bad khamtam u balait na ka jaboh jabain (high moral integrity). Kaba sngewkthang eh ka long ba ki Kandidet ki shalai myrsiang, ki pynbiej, ki pyndonkam da ki buit poh, ki kroh ki kjor da ki jingai babun jait bad thong da ka peisa ia ki nongvote, ia ki seng Samla, ki Seng Longkmie, ki Seng Rangbah, ki Pastor, ki Phadar, ki Sister, ki Bishop, ki Tymmen Basan, nongtrei Balang, ia ki Balang ne niam bad lada ki pynbam peisa kumne ia ki nongjied, ialade ki ruh kin shah thied ne shah thong peisa ha ki Party heh spah ne ki Agent jong ki ban iathaw sorkar bad hadien kata kin iaklop ia ka peisa tyngka ka ban leit sha ki kam pynroi jong ki nongshongshnong. Haba jia kumne kam dei ba ka politiks kaba jaklia ne ka Jylla kaba pyut hynrei dei ki briew kiba don ha ka party politiks bad kiba synshar ia ka Jylla ki jaklia jaboh. Ka la jia aiu ia kane ka sorkar hapoh Ka jingialam jong ka NPP? Kane ka sorkar ba mynta ka la paw nam tam na baroh ki sorkar ba la dep ha ka jingkyrniom ha ka bamsap bampong. Ka la leh aiu ha baroh kine ki 5 snem? Ka lapmiet ban pynlong ia kita ki jait-pa-ki jait festival aiu re tang ban ioh thep pla! Shano kita ki kam tei Jylla? Ki Samla khlem kam ki jyllei hynrei ki kam ha ki ophis bapher ki lait da ki hajar hynrei kane ka sorkar kam thepkam ia bun ki Samla wad kam bad balei ka nohshiliang khmat palat ha ki kam kontrak ne leh business ha ki department haduh ba ha ki kam kontrak ki don ki Minister kiba trei hi? Kane ka sorkar ka pynbiej da ki Skhim ai khunsniang ne ki Skhim khyllah Kyrteng ki barit baria ban pynthame bad khwai paidbah ba la jan eh ka ilekshon!

Ka synshar khadar ka la jyllei da ka synrum jong ka jingijli kein namar ym ai jaka ia U Blei Nongbuh Nongthaw la ha Assembli lane ha Secretariat jong ka Jylla. Kaba ym lah ban pyrkhat bad pyndum buit ngain ka long ba la jan 100 na ka 100 na ki MLA bad Nongsynshar ki dei ki Khristan ne ki ba kam Khristan ialade, hynrei ki kam pyniaid kam synshar pat ki long ki kam jong u soitan. Kumta la khot la wer ia ki paidbah Nongthep-vote bad ia kito baroh ki Kandidet, khamtam kiba dang eh dang khlain ki Samla rangbah, ban pyndem ialade hakhmat U Trai, pan hukum na U ban don ryngkat lang ha kane ilekshon baroh shilynter bad ha ka kam synshar khadar. “Ki briew jong nga ki la jied ia ki Syiem (MLA) hynrei ki khlem da kylli ia Nga. Ki la thung ia ki nongialam (MLA) hynrei khlem ka jingmynjur jong Nga. Da ka rupa bad ka ksiar (ka peisa bad jingai sngewbha) ki la thaw ia ki bleithaw-tang ban jot ialade” (Hosia 8:4). Buh ia U hapdeng duh bad baroh kin iaid beit iaid ryntih ban lait na ka jingbymman baroh khoit. Kiba angnud ia kane ka kam shakri paidbah bakyntang “..ki dei ban shimti ia kane ka kam (MLA) khlem ka jingkhmih lynti ban myntoi shimet ne kum ka kam ban ioh shim kabu” (they should seek to practice this art without regard for their own interest or for their material advantages” (Gaudium et Spes 75) kaba dei ka kam shakri ia U Blei ruh. Hadien ba la jop ki dei ban duwai kumne, “To mynta ko Trai ko Blei jong nga Me la pynlong Syiem (MLA) ia u shakri jong Me… to ai namarkata ia u shakri jong Me ka jingmut kaba shemphang ban (shakri) synshar ia u paid jong Me, khnang ba ngan dup nang ban pyniapher hapdeng kaba bha bad ka basniew, namar uei kein u ba lah ban (shakri) synshar kat une u paid jong Me u bakhraw?”.(1 Syiem: 3:7-9).