Shri. O.R Shallam.
Panaliar, Jowai.
Hapdeng ka jingwan lyngshop jong ka khlam Covid-19 ha ka jylla ha kaba da ki spah ngut kiba khlad noh bad da ki hajar pat kiba dang shah sumar ban koit na kane ka jingpang. Ka jing pynjlan ia ka jingkhang dam (Lockdown) ban iada na ka jingpur saphriang jong une u khnang jingpang kala ktah pynban ia ka kamai kajih bad ka jakpoh jong u kup shilliang u sem shilliang khamtam ia ki longiing kiba trei bylla mynsngi ban pynbiang bad pyndap pat ia ka jingbam ki khun ki kti mynmiet.
Ka sorkar jylla hapoh ka jingialam jong u Conrad Sangma kum u myntri rangbah kala shim pat sa kawei ka sienjam ka ban wanrah ia ka jingma bad ka jing jynjar ia ki nongshong shnong khamtam ha ki lum Khasi bad Jaintia. Ka jingthmu ban aiti noh ia ka MeECL sha ka kompeni REC Power Distribution Company Limited lyngba ka Injection Based Distribution Franchisee (IBDF) na ka bynta arphew san (25) snem ka pyni ia ka rukom khaii bad kamai pisa ha kane ka sorkar synrop. Kaei kaba sngewdiaw shuh shuh kadei ba kane ka kompeni sam bording kan peit bad shimti ia ka Shillong circle bad ka Jaintia circle jong ka MeECL katba ia ka ri lum Garo pat la pynlait na kane ka jingthmu. Ha ka kyntien ba suk ban sngewthuh ka mut ba ia ka Ri lum khasi bad Jaintia jong ngi la die noh sha ka kompeni ha kaba ia ka rukom sam bor ding bad pynlum pyllang ia ka jingsiew jingtda na ka bording yn shimti noh da ka kompeni na ka bynta jong ka 25 snem.
Kane ka sorkar synrop kaba dang iaid lynti mynta 3 snem kala pyni shibun ki buit khaii bad buit kamai pisa ki jongka naduh ka jingkhaii dewiong be-ain, ka rukom pyniaid bad pyntrei ia ki kam ban iada na ka khlam, ka jingtorti bad bym biang ha ka rukom pyniaid ban sam bording ha ka jylla nalor kiwei kiwei.
Ka jingduna ha ka jingpyniaid kam ka sorkar ha ka tnad bording kala wanrah ia ka jing bym shaniah shuh bad pyndom ia ki nongshong shnong. Ko Myntri rangbah bad Myntri bording ka jylla, Balei phi die ia ngi ki Khasi ki Jaintia sha ki Kompeni ki riew shimet? Balei phim pat biang mo na ka jingioh baheh ba phi lum na ri lum Garo? Lada ia kine ki circle ar tylli phin aiti sha ka Kompeni, aiu kan jia ia ki bapli ki hajar ngut ki nongtrei trai jylla ba im jakpoh na ka MeECL? Ka lawei jong ka tnad bording ha ka jylla ka la dum bad bym don jingkyrmen.
Kaei kaba pynsngew dom shuh shuh dei ka jing wan pyndait ia ki smart meter ha ki thliew iing jong ki nongshong shnong kiba mih bad rung na kawei ka thliew iing sha kawei pat wat hapdeng jong ka khlam namar ki hap ban kohnguh beit ia ka hokum bala pynmih da kiba don ha ka bor. Kane ka jingwan pyndait ia ki meter khlem ka jingsngewthuh ne ka jing pynsngewthuh paitdbah ka la wanrah ia ki jingwit bad jing bym shngain ha ka imlang sahlang.
Mynta ka shong sa tang ha ki Nongialam paitbah na Ri lum khasi bad Jaintia ba kin ialeh pyrshah ia kane ka jingleh don bor jong ka sorkar. Hato ki MLA Khasi bad Jaintia jong ngi kin shah ba ki Sangma kin die ia ngi na ka bynta ka jingmyntoi shimet bad ka iing ka sem jong ki? Ko Myntri rangbah bad Myntri bor ding, to dam noh shisyndon ban pynlong ia ka ri lum Khasi bad Jaintia kum ka jaka khaii ba phin ioh jingmyntoi ia lade bad ka iing ka sem jong phi. Haduh mynta kane ka sorkar synrop kala long lypa ka bym ler bad kaba la phiel ia ngi u paitbah. Ka por kala dei eh ia u Myntri rangbah bad u Myntri bor ding ba kin hiar shuki lane ba kane ka sorkar kan pra noh khnang ban thaw da ka sorkar thymmai ka ban trei katkum ki jigmut ba shisha jong ka riti synshar paidbah.
Phi don ban ong eiei?