Shillong: Ka HYC War Jaintia Circle hapoh ka jingialam u Vice President u Rangbah Jembis Khongiong bad u Assistant Secretary u Samla Ededisuk Shylla, hynnin ka sngi, ki la leit jurip ia u surok Tamabil Dawki.
Ha katei ka jingleit jurip ka seng ka la lap ba utei u surok, u la buh jingma ia ki paidbah nongleit nongwan, naba lyngba u tei u surok la lap ba la dap da ki thliew bad ka jingktieh la kum ka pynthor kba. Shuh shuh la lap ba kawei ka jingkieng utei u surok ka la sdang orpait bad ki nar kiba don shapoh ki la mih shabar.
Halor utei u surok ka seng ka dap da ka jingsngewkhia kaba jur, namar u tei u surok um long shuh uba shngaiñ ia ki paidbah, bad u la buh jingma pynban, namar utei u surok u lah ban wanrah ka jingjia ba sngewsih ha kano kano ka por khamtam haba hiar slap.
Haba la ioh ban iakren bad uwei u Contractor u la iathuh ba ka Sorkar kan tei bad pyntrei shwa ia ka iew bad hadien nangta kin shna ia u tei u surok.
Kumta ka seng ka kyntu jur ia u MLA ka Thaiñ u Jiang Lahkmen Rymbui, ba bat kum u myntri Border Area Minister ka Sorkar MDA ban maramot bad shna pynbha shisyndon ia utei u surok khlem da pynslem shuh bad ym dei ban ap haduh ban da jia kaei kaei ka jingjia basngewsih ia ki paidbah, namar ka jingjot utei u surok kam dei shuh kaba kai.
Shuh shuh ha katei ka jingleit jurip ka Seng ia utei u surok, la lap, ba utei u surok u la kylla khapngiah, namar la lap ba ka jingleh khlem akor ki trok ka buh jingeh ia ki paidbah, namar ki trok ba iaid hangtei kim iaid kat kum ki rule ki aiñ bad katkum ba la lap, don ki trok kiba iaid arlaiñ bad don ki trok kiba ieng ha ka jaka bymdei ban ieng.
Haba iakren bad u General Secretary ka Association ki Draibar Trok, u la iathuh ha kine ki sngi ba ladep ki la ialeh shitom ban weng ia kita ki jingeh.
Phi don ban ong eiei?