Ka surok Shillong Dawki, ka la kylla kum ka lhuh wah

Shillong:Ka surok bah NH40 Shillong-Pynursla-Dawki ka la kylla kum ka lhuh wah khamtam narum Pynursla na ka jingdap um, paw ki thliew ki syar.

Ha ki dur khih ba ring ki nongshong shnong mynhynnin ka sngi, la iohi ba ka surok kaba la shu ieh noh ka kompeni ka surok ka la mih ka khyndew, ki maw haduh ba ka la buh jingeh ia ka leit ka wan jong ki kali.
Kane ka surok ka hap ha Pynursla Constituency ha kaba la mihkhmat da u symbud myntri rangbah ka jylla u bah Prestone Tynsong uba dei peit ia ka tnad PWD, bad ka dei kaba bunkam bha namar da ki hajar tylli ki kali ki iaid man ka sngi kynthup ki nongwankai, ki trok shalan mar sha Bangladesh.

Ka jingsniew tasam ka surok, ka la pynsyrtok ia ki paidbah haduh katta katta ym tang ha ka aiom ba rang hynrei ha ka aiom slap ruh kumjuh.
Ki katto katne ki nongshong shnong ka thain haba pyntip sha u nongthoh khubor, kila pynpaw ia ka jingsngew pang met bad bynniaw jur ia ka jingshah iehshrah kane ka surok kaba la sdang ban krait ia ka khyndew bad ki maw hynrei mynta ka la sangeh pynban bad kila sngewsih ba haduh lano ka jingpyndep ia kane ka surok kan urlong namar ba la jan ar snem mynta kila mad ia ka jingiaid ha ka khohrum khohram haduh katta katta.

Lah ban kdew ba u myntri ka tnad Road Transport & Highways ka sorkar pdeng u Nitin Gadkari u la pynbna paidbah ha ka por ba u wan ialap elekshon ha u bnai Rymphang ba ka jingpyndep ia ka surok Shillong-Dawki kan long ha u Iaiong 2024 kaba mut lashem snem hynrei kumba ka paw, kan long kaba eh ban pyndep ha katei ka por. Dang shen, ka National Highways & Infrastructure Development Corporation Ltd. Ministry of Road Transport & Highways (NHIDCL) ka la weng ia ka kontrak jong ka kompeni ARSS kaba ioh ban pyntrei ia ki katto katne ki bynta jong kane ka surok katba kiwei ki la phet noh, kaba la pynsahteng ia kane ka surok haduh kine ki sngi.