Ka surok na Umshyrpi sha Tamabil

Bah RM Shabong

U myntri ka tnat PWD, ula iai kren biang halor ka jingthmu jong ka sorkar Jylla, ban tei ia ka surok kali kaba heh bad kaba long ban iaid saw kali na Umshyrpi sha Hynniewmer bad ter shaduh sha Tamabil bad katei ka long ka phang kaba donkam bha, ban teh lakam ia ka jingdheng kali kaba jubor bha na Hynniewmer sha Iew, kaba la iai jia man ka sngi.

Wat la katei ka dei ka jingmut kaba bha tam bad kaba hap ban ai jing kyrshan radbah ia ka sorkar Jylla bad ia ka tnat PWD, hynrei ha kajuh ka por, katei ka tnat lem bad ka tnat shipai, ki tnat pulit bad ki bor shnong, ki la dei ban wad lad shwa ban pyn duna ia ka jingdheng kali kaba la tasam bad kaba la jia man ka sngi sha ka thain.

Haba shu peit kyllum, lah ban ong ba ka dheng kali ha ka thain Upper Shillong, kam pat dei ban jia, lada ki don ki lad kiba yn shim khia bad kyrkieh, da kitei ki tnat kiba la kdew haneng bad kawe na ki lad ka long ban pynbeit noh mardor ia ka surok kyllain ha Laimer, ban nym pynthut ia ki kali kiba leit iew bad ki kali kiba iaid pyllun ia katei ka surok bad kam dei tang katta, ka don ka surok kaba pom na 101 Cantonment, kaba mih sha Umshyrpi bad katei ka la dei ban long ka surok kaba shipor, ba kin iaid ki kali kiba hiar sha Iew bad lada yn ioh ban plie ia katei ka surok, khlem pep, kan pyn duna shi katdei ia ka leit ka wan ki kali.

Lait nangta, ka la dei ka por ban pynkhlad ia ki kali kiba leit sha Iewduh bad ki kali kiba leit sha Lumdiengjri bad lada ka iaid ha katei ka rukom, kumta kito kiba sahkut naduh na Lummawbah, kin sngewthuh ia ka lad ba kin noh ha ka lynti kaba kumno, ban ailad ia kiwei ba kin nang iaid shakhmat bad imat, ka la bha, ba ia ka surok rit kaba najan Umshyrpi ban kiew sha Barapathar, ban pyniaid noh shi kali, ha kaba kiba mut ban leit sha Lumdiengjri, kin pyndonkam ia katei ka surok rit.

Ka jingtrei ia ka surok na Umshyrpi sha Tamabil, ka lah ban shimpor da ki bun snem, wat la ka jingthmu jong ka sorkar (lehse), ka long ban pyndep hi, ha shwa ka elekshon MLA 2023; hynrei kat haduh ba ngin da tyllun ia ki 2snem duna eiei, kumta ka donkam ka lad kaba kyrkieh bad kaba shipor bad ka jing pyrshang ruh, kumba ki la pyrshang ia kiwei pat ki lad kiba don ha ka nongbah bad lehse katei kan dei ka lynti ban pyn jynsur mynsiem ia ki nongleit nongwan.