Shillong: Hadien ba ka hynriew bnai ka la kut, ka kompeni na Japan ka Japan International Corporation Agency (JICA) kan wan biang sha nongbah Shillong ban ia kren bad ka sorkar shuwa ba kan pyntreikam ia ki projek kiba ka la pynkhreh na ka bynta ban weng ia ka jingjubor ka dheng kali ha nongbah Shillong.
Haba ia kren bad u Chairman ka Meghalaya State Planning Board (MSPB) u bah Lambor Malngiang u la ong ba shuwa ban sdang pyntreikam ia ki projek bapher jong ka, ka JICA ka kwah ban tip na ka sorkar, kaei ba ka sorkar ka i donkam kyrkieh eh ban leh. U bah Lambor u la ong ba ki don ter ki thup jingdonkam kiba ka sorkar ka la pynkhreh bad ia kiba donkam eh la buh shakhmat.
U la iathuh ba ka jingdonkam ba ka sorkar ka la buh hakhmat eh ka dei ban shna noh ia ka surok na Laitkor sha Pomlakrai ka ban mih sha Laitlyngkot bad katei ka surok ka jngai kumba 20 kilomitar. Nangta kaba ar pat, u la ong ba ha sor Shillong ka sorkar ka la kdew ba donkam eh ban shna shuwa ia ka jaka ieng kali ha Barik, kaba la phah ripod da ka Planning Department. Nalor kitei 2 tylli u bah Lambor u la ong ba ka surok na Umshyrpi sha Dawki ka dei ruh kaba hakhmat eh bad katei ka kam kan iaid beit kumba la thmu bad ka sorkar kan buh ruh ia ka Kad ia rung ia mih hapdeng ki ar tylli ki Ri.
Nangta u bah Lambor u la ong ba ka tnad Planning ka la buh ruh hakhmat ka sorkar ba ka dei ban shna noh ia ka surok na Sawlad sha Nongrah bad na Nongrah sha It Shyrwat bad katei ka surok ka dei ban mih sha Mawlai lane sha By Pass hynrei ka dei ban iaid lyngba ia ka NEIGRHIMS. U la ong ba ka jingmut jong katei ka surok ka long ba ki kali Tourist kiba wan shane kim donkam shuh ban rung hapoh nongbah Shillong bad katei kan lait na ka jingkhapngiah ka sor.
Lah ban kdew ba hynriew bnai mynshuwa ka la don ka jingiakynduh hapdeng ki nongmihkhmat na ka JICA bad ka tnad Planning jong ka sorkar Meghalaya bad ha katei ka jingiakynduh la rai ba ka kynhun ba 9 ngut na ka JICA kin sorbe ia ka nongbah Shillong kumno ban pynkhreh ia ki Projek jong ki kaba kin ai ia ka ripod hapoh ka hynriew bnai. Hadien ba la kut katei kahynriew u bah Lambor u la ong ba shen kin sa mynta u bnai ban ia kynduh biang ia ka sorkar ban pyndep ia ki jingdonkam baroh na ka bynta ban sdang noh ia ka kam.